సిబిఐ ముందుకు మరో వైయస్ జమానా అధికారి?

By Pratap

Published: Thursday, February 2, 2012, 9:57 [IST]

వైయస్ రాజశేఖర రెడ్డి ప్రభుత్వ హయాంలో కీలక పాత్ర పోషించిన మరో ఉన్నతాధికారి కూడా సిబిఐ ముందుకు విచారణ నిమిత్తం హాజరు కానున్నట్లు తెలుస్తోంది. రాష్ట్ర ఎన్నికల కమిషనర్‌గా పనిచేసి పదవీ విరమణ చేసినన పి. రమాకాంత్ రెడ్డిని సిబిఐ విచారణకు పిలిచినట్లు తెలుస్తోంది. వైయస్ రాజశేఖర రెడ్డి హయాంలో రమాకాంత్ రెడ్డి చీఫ్ సెక్రటరీగా పనిచేశారు. వైయస్ రాజశేఖర రెడ్డి ప్రభుత్వ హయాంలో మంజురైన పలు మౌలిక సదుపాయాల, పారిశ్రామిక ప్రాజెక్టులకు సంబంధించిన ఫైళ్లపై రమాకాంత్ రెడ్డి చీఫ్ సెక్రటరీ హోదాలో సంతకాలు చేసినట్లు చెబుతున్నారు. దీంతో రమాకాంత్ రెడ్డిని విచారించడానికి సిబిఐ సమాయత్తమవుతున్నట్లు తెలుస్తోంది.

తండ్రి వైయస్ రాజశేఖర రెడ్డి అధికారాన్ని అడ్డం పెట్టుకుని వైయస్సార్ కాంగ్రెసు పార్టీ అధ్యక్షుడు వైయస్ జగన్ పెద్ద యెత్తున సొమ్మును పోగు చేశారని సిబిఐ ఆరోపిస్తోంది. పలు సంస్థలు జగన్ సంస్థల్లో పెట్టుబడులు పెట్టడానికి వైయస్ అధికారమే కారణమని చెబుతున్నారు. ఎన్. ప్రసాద్‌కు చెందిన వాన్‌పిక్ పోర్టు ప్రాజెక్టుపై సిబిఐ రమాకాంత్ రెడ్డిని విచారించే అవకాశం ఉంది. గురువారం తమ ముందు హాజరు కావాలని సాధారణ పరిపాలనా శాఖ (రాజకీయ) ప్రిన్సిపల్ సెక్రటరీ అజయ్ మిశ్రాను తమ ముందు హాజరు కావాలని సిబిఐ ఆదేశించింది.

Published On February 2, 2012