నాలుగో రోజూ పార్లమెంటు వాయిదా

న్యూఢిల్లీ: గుజరాత్‌ ముఖ్యమంత్రి నరేంద్ర మోడిని తప్పించాలని ప్రతిపక్షాలు డిమాండ్‌ చేయడంతో గురువారం కూడా పార్లమెంటు ఉభయ సభలు స్తంభించాయి. దీంతో పార్లమెంటు ఉభయ సభలు వరుసగా నాలుగో రోజు వాయిదా పడ్డాయి.నరేంద్ర మోడి విషయమై అధికార, ప్రతిపక్ష సభ్యుల మధ్య తీవ్ర వాగ్వివాదాలు జరిగాయి.

లోక్‌సభ గురువారం ఉదయం సమావేశం కాగానే ప్రతిపక్షాల సభ్యులు వెల్‌లో గుమికూడి నరేంద్ర మోడి ఉద్వాసనకు డిమాండ్‌ చేశారు. మోడి హటావో, దేశ్‌ బచావోఅంటూ వారు నినాదాలు చేశారు. సోనియా గాంధీ మాఫీ మాంగో, దేశ్‌కే గద్దారోంకో పొటా మే గిరఫ్తార్‌ కరో (సోనియా గాంధీ క్షమాపణ చెప్పు, దేశద్రోహులను పొటా కిందఅరెస్టు చేయండ) అని నినాదాలు చేస్తూ అధికార పక్ష సభ్యులు వెల్‌ వైపు దూసుకొచ్చారు. ఎన్ని మార్లువిజ్ఞప్తి చేసినప్పటికీ సభ్యులు వినకపోవడంతో డిప్యూటీస్పీకర్‌ పి.ఎం. సయీద్‌ సభను శుక్రవారం నాటికి వాయిదా వేశారు.

రాజ్యసభలోనూ ఇదే పరిస్థితి నెలకొంది. నరేంద్ర మోడి ఉద్వాసనకు డిమాండ్‌ చేస్తూ ప్రతిపక్షాల సభ్యులు సభా కార్యక్రమాలను స్తంభింపజేశారు. దీంతో చైర్మన్‌ కృష్ణకాంత్‌ సభను శుక్రవారం నాటికి వాయిదా వేశారు.