హద్దుమీరిన శివప్రసాద్‌ రాజభక్తి

హైదరాబాద్‌ః తమ మధ్య విభేదాలకు కారణం చంద్రబాబునాయుడే నంటూ కాంగ్రెస్‌ నేతలు వైఎస్‌, ఎంఎస్‌ఆర్‌ చేసిన ఆరోపణలపై తెలుగుదేశం పార్టీ తీవ్ర ఆగ్రహం వ్యక్తం చేసింది. కాంగ్రెస్‌ నేతల ప్రచారాన్ని ఖండించేందుకు దేశం అధికార ప్రతినిధి మాజీ మంత్రి శివప్రసాద్‌ ఏర్పాటు చేసిన విలేకరుల సమావేశం రసాభాసగా ముగిసింది.

విలేకరులను కాంగ్రెస్‌ ఏజెంట్లుగా శివప్రసాద్‌ చేసిన వ్యాఖ్యపైవిలేకరులు తీవ్ర నిరసన ప్రకటిస్తూ సమావేశంహాలు నుంచి వాకౌట్‌ చేశారు. దాంతో ఎన్‌టిఆర్‌ భవన్‌లో వున్నసీనియర్‌ నేతలంతా పరుగులు తీస్తూ వచ్చి విలేకరులను బుజ్జగించడానికి శతప్రయత్నాలు చేశారు.విలేకరుల సమావేశం ప్రారంభం కాగానే, కాంగ్రెస్‌ నేతలు తమ మధ్య చిచ్చుకు చంద్రబాబు ప్రయత్నిస్తున్నారని ఆరోపించడాన్ని శివప్రసాద్‌ ఖండించారు. చంద్రబాబుకు ఆ అవసరం లేదని అంత సమయమూ లేదని ఆయన చెప్పారు. కాంగ్రెస్‌ నేతలుఅపర భస్మాసురులనీ, స్వీయ వినాశనం కొనితెచ్చుకుంటారని వారిని ఎవరూ పనిగట్టుకుని దెబ్బతీయాల్సిన అవసరం లేదనివీరావేశంతో శివప్రసాద్‌ విరుచుకుపడ్డారు. ఈ దశలోవిలేకరులు అడిగిన ప్రశ్నలను కూడా ఆయన పట్టించుకోలేదు.పైగా విలేకరులను కాంగ్రెస్‌ ఏజెంట్లు అంటూ నిందలకు దిగడంతో రభస జరిగింది.