అక్రమాలు ప్రశ్నించడమే పాపమా?

హైదరాబాద్‌ః రాష్ట్ర ప్రభుత్వం ప్రజలను ఉద్దరిస్తుంటే కాంగ్రెస్‌ అడ్డుపడుతున్నదంటూ ముఖ్యమంత్రి చంద్రబాబు చేసిన విమర్శలను కాంగ్రెస్‌ తీవ్రంగా ఖండించింది. పనికి ఆహారం పథకం కింద రాష్ట్రానికి కేంద్రం బియ్యం అందజేయాలని కాంగ్రెస్‌ కూడా కోరుతున్నదని ఈ విషయంలో కేంద్రం ఔదర్యానికి తాము కృతజ్ఞతలు కూడా చెబుతున్నామని ఆయన అన్నారు.

అయితే ప్రజలకు, కష్టజీవులకు దక్కాల్సిన బియ్యం తెలుగుదేశం నేతల భోజ్యంగా మారడాన్నే తాము ఎత్తిచూపిస్తున్నామని దానినే ప్రశ్నిస్తున్నామని సిఎల్‌పి నేత వైఎస్‌ చెప్పారు. దీనినే తెలుగుదేశం అగ్రనేత భరించలేకపోతున్నారని ఆయన అన్నారు.పేదల నోట్లో దుమ్ము కొట్టడాన్ని తాము ఎప్పుడూ ప్రశ్నిస్తామని ఆయన స్పష్టం చేశారు. బియ్యం కార్యక్రమంలో అక్రమాలు జరుగుతున్నవిషయం తాము మాత్రమే కాకుండా పలు పత్రికలుకూడా సాక్ష్యాలతో సహా బయటపెట్టాయని ఆయన అన్నారు.