సస్పెండయిన అధికారి ఆత్మహత్య

హైదరాబాద్‌: అవినీతి ఆరోపణలపై నాలుగు నెలల క్రితం సస్పెండయిన ఆంధ్రప్రదేశ్‌ డెయిరీ డెవలప్‌మెంట్‌ కార్పోరేషన్‌ (ఎపిడిడిసి- మదర్‌ డెయిరీ) డిప్యూటీ డైరెక్టర్‌ గోపాలకృష్ణ ప్రసాద్‌ శుక్రవారం ఆనుమానాస్పద స్థితిలో మరణించారు. మిత్రుడ్ని కలవాలని చెప్పి తెల్లవారుజామున ఇంట్లోంచి బయలుదేరిన ఆయన లాలాపేట్‌ మల్లాపూర్‌ ప్రాంతంలోరైలు పట్టాలపై శవమై కనిపంచాడు.

జేబులో కనిపించిన లేఖను బట్టి ఆయనది ఆత్మహత్య కావచ్చునని భావిస్తున్నారు. తన మరణానికి మదర్‌డెయిరీ మేనేజింగ్‌ డైరెక్టర్‌ దేబబ్రత కంఠ కారణమని రాసిన లేఖ ఆయన జేబులో దొరికింది. అయితే, గోపాలకృష్ణ ప్రసాద్‌ మరణంతో తనకు ఎలాంటి సంబంధం లేదని దేబబ్రత కంఠఅంటున్నారు. కృష్ణా జిల్లా గుడివాడకు చెందిన గోపాలకృష్ణ ప్రసాద్‌ ఎపిడిడిసి మహబూబ్‌నగర్‌ శాఖలో డిప్యూటీ డైరెక్టర్‌గా విధులు నిర్వహిస్తున్నారు. ఇతనికి హైదరాబాద్‌లోని సంస్థ కార్యాలయం సమీపంలో ఒక సొంత ఇల్లు ఉన్నది. నిరుడు మహబూబ్‌నగర్‌ శాఖలో కోటీఇరవై లక్షల మేరకు కుంభకోణం వెలుగులోకి వచ్చింది. ప్రాథమిక దర్యాప్తులో అది వాస్తవమేనని తేలింది. దీంతో ప్రసాద్‌ను, వనపర్తి శాఖ మేనేజర్‌ ప్రేంకుమార్‌ను సస్పెండ్‌ చేశారు. ఈ కుంభకోణంపైవిచారణకు త్రిసభ్య సంఘాన్ని ఏర్పాటు చేశారు. కమిటీప్రాథమిక నివేదిక ఆధారంగా అదే శాఖలో పని చేసే మరో ముగ్గురిని కూడా సస్పెండ్‌ చేశారు.