అట్లాంటాలో కొత్త సాఫ్ట్‌వేర్ సెంటర్‌: విప్రో ప్రేమ్‌జీ

సిలికాన్ వ్యాలీ: ప్రముఖ ఇన్ఫర్మేషన్ టెక్నాలజీ సంస్థ విప్రో తన తొలి సాఫ్ట్‌వేర్ డెవలప్‌మెంట్ సెంటర్‌ను అట్లాంటాలో ప్రారంభించనుంది. ఈ సెంటర్‌లో వచ్చే ఏడాదిలోపు 200 మంది ఐటీ నిపుణులను తీసుకుంటామని, ఆ తరువాత వారి సంఖ్యను 500కు పెంచుతామని విప్రో అధినేత అజీమ్ ప్రేమ్‌జీ తెలిపారు.

ఆయన అట్లాంటా బిజినెస్ క్రానికల్‌కు ఇచ్చిన ఇంటర్వ్యూలో ఈ విషయాన్ని వెల్లడించారు. అంతేకాకుండా అమెరికాలో ఐటీ నిపుణుల కొరత రోజురోజుకు పెరుగుతోందని, దీనిని అక్కడి కంపెనీలు తీవ్రంగా పరిగణించి సత్వర చర్యలు చేపట్టాల్సిన అవసరం ఉందన్నారు.

అమెరికా వీసాలపై విధించిన గరిష్ఠ పరిమితి ఆ దేశ పోటీ సామర్థ్యాన్ని దెబ్బతీస్తుందని ప్రేమ్‌జీ అన్నారు. ఐటీ రంగంలోని ఉద్యోగాలన్నీ ఇండియా లాంటి దేశాలకు తరలిపోతున్న మాట వాస్తవమే అయినప్పటికీ వ్యాపారపరంగా అది చివరికి అమెరికాకే ప్రయోజనం చేకూరుస్తుందని ఆయన అభిప్రాయపడ్డారు.