ప్రచారయాత్రకు వైయస్ శ్రీకారం

హైదరాబాద్‌: కాంగ్రెస్‌ పార్టీ ఎన్నికల ప్రచారానికి ముఖ్యమంత్రి రాజశేఖరరెడ్డి బుధవారం ఉదయం శ్రీకారం చుట్టారు. తొలుత ఆయన హైదరాబాద్‌ సోమాజిగూడలోని రాజీవ్‌గాంధీ విగ్రహానికి పూలమాలలు వేశారు. తర్వాత అక్కడినుంచి తన ప్రచార జైత్రయాత్ర ప్రారంభించారు. పార్టీ నేతలు, కార్యకర్తలు పెద్ద సంఖ్యలో ఈ కార్యక్రమంలో పాల్గొన్నారు. అనంతరం నెక్లెస్‌రోడ్డులో ఇందిరాగాంధీ విగ్రహానికి పూలమాల వేసి నివాళులు అర్పించారు. మంత్రి ముఖేష్‌ గౌడ్‌, గ్రేటర్‌ హైదరాబాద్‌ కాంగ్రెస్‌ అధ్యక్షుడు దానం నాగేందర్‌ తదితరులు ఆయన వెన్నంటి ఉన్నారు.

అక్కడి నుంచి ఆయన ఇతర ప్రాంతాలకు బయలుదేరారు. రంగారెడ్డి జిల్లా చేవెళ్ల నుంచి తన ప్రచార కార్యక్రమానికి ఆయన శ్రీకారం చుట్టాల్సి ఉంది. చేవెళ్ల తనకు కలిసి వస్తుందనే నమ్మకం ఆయనకు పూర్తిగా ఉంది. దీంతో ఆయన చేవెళ్లలో తొలి బహిరంగ సభ నిర్వహించే అవకాశం ఉంది. ముఖ్యమంత్రి కార్యక్రమాలతో హైదరాబాదు నగరంలో పలు చోట్ల ట్రాఫిక్ కు అంతరాయం కలిగింది.