చిరు సమీక్షలకు మిత్రా హాజరు

హైదరాబాద్‌: ప్రజారాజ్యం పార్టీ అధినేత చిరంజీవి జిల్లాలవారీగా చేపట్టిన పార్టీ సమీక్షా సమావేశాలకు బుధవారం మిత్రా హాజరయ్యారు. తీవ్ర అసంతృప్తితో ఉన్న మిత్రా ప్రజారాజ్యం పార్టీకి రాజీనామా చేస్తారని, ఈ విషయాన్ని చిరంజీవికి తెలియజేశారని వార్తలు వచ్చాయి. ఈ వార్తలను ధృవీకరిస్తూ ఆయన పార్టీ రాజకీయ వ్యవహారాల కమిటీ సమావేశానికి హాజరు కాలేదు. అయితే బుధవారం జిల్లా సమీక్షా సమావేశాలకు హాజరయ్యారు. దీంతో పార్టీలో ఆయన కొనసాగడానికి నిర్ణయించుకున్నట్లు అర్థం చేసుకోవచ్చు.

ఎన్నికల్లో విజయావకాశాలపై ప్రజారాజ్యం పార్టీ జిల్లా సమీక్షలను చేపట్టింది. రోజుకు మూడు జిల్లాల చొప్పున వారంపాటు ఈ సమీక్షలు హైదరాబాద్‌లోని ఆ పార్టీ కార్యాలయంలో జరుగుతాయి. ఇందులో భాగంగా బుధవారం నల్గొండ, ఖమ్మం, వరంగల్‌ జిల్లాలకు చెందిన అసెంబ్లీ, పార్లమెంట్‌ అభ్యర్థులతో చిరంజీవి సమావేశమయ్యారు. ఏయే స్థానాల్లో విజయావకాశాలు ఉన్నాయి, ఎక్కడ గట్టి పోటీ ఇస్తున్నాం వంటి అంశాలను ఈ సమావేశంలో ప్రధానంగా చర్చించారు.