ప్రజారాజ్యం పార్టీ మిత్రా గుడ్ బై?

హైదరాబాద్‌: ప్రజారాజ్యం పార్టీ ప్రధాన కార్యదర్శి డాక్టర్‌ మిత్రా తాజాగా మరోమారు రాజీనామాకు సిద్ధపడినట్టు విశ్వసనీయంగా తెలిసింది. నాలుగు రోజుల క్రితం విదేశాల నుంచి తిరిగి వచ్చిన డాక్టర్‌ మిత్రా రెండు రోజుల క్రితం పార్టీ కార్యాలయంలో అధినేత చిరంజీవిని కలిసి తాను రాజీనామా చేస్తానని చెప్పినట్లు సమాచారం. దీనికి చిరంజీవి స్పందిస్తూ రాజీనామా ఎందుకు, ఉండులే అని తేలికగా వ్యాఖ్యానించినట్టు ప్రచారం జరుగుతోంది. చిరంజీవి స్పందనలో తీవ్రత లేకపోవడంతో మిత్రా ఆవేదనకు గురైనట్టు చెబుతున్నారు. దీనిపై ఆయన తన సన్నిహితుల వద్ద మదనపడినట్టు తెలిసింది. గతంలో మిత్రా ఒక్కరోజు అందుబాటులో లేకపోయినా కలవరించే అధిష్ఠానం ప్రస్తుతం స్వయంగా పార్టీ కార్యాలయానికి వచ్చి కనిపిస్తే తప్ప పలకరించడం లేదని పార్టీ వర్గాలు చెబుతున్నాయి.

రాజీనామా అంటూ కలకలం సృష్టించవద్దని కూడా చిరంజీవి మిత్రాతో అన్నట్టు ప్రచారం జరుగుతోంది. పార్టీ నిర్మాణ ప్రక్రియ ప్రారంభమైనప్పటి నుంచి మిత్రా చిరంజీవికి అనేక లేఖలు రాశారు. కొన్ని లేఖలను స్వయంగా చిరంజీవికి అందజేసిన సందర్భాలు కూడా ఉన్నాయి. అయినా చిరంజీవిలో మార్పు రాకపోవడంతో మిత్రా చాలా రోజులుగా తన సన్నిహితుల వద్ద అసంతృప్తి వ్యక్తం చేస్తూనే ఉన్నారు. ఇటీవల ఎన్నికల ఫలితాలపై జరిగిన సమీక్షా సమావేశాలపై కూడా మిత్రా సంతృప్తిగా లేరు. ఈవీఎంలు, పార్టీ గుర్తు (రైలింజన్‌)లో గందరగోళం కారణంగానే ఓడిపోయామన్న సూత్రీకరణ తప్ప ఓటమికి అసలు కారణాలేమిటో అన్వేషించలేకపోయారని ఆయన తన సహచరులతో వ్యాఖ్యానించినట్టు తెలిసింది.