పిసి వివరణపై సుష్మా అసంతృప్తి

న్యూఢిల్లీ: తమ పార్టీ యువ పార్లమెంటు సభ్యుడు వరుణ్ గాంధీకి ప్రభుత్వం కల్పించిన భద్రతపై కేంద్ర హోం మంత్రి పి.చిదంబరం ఇచ్చిన వివరణతో బిజెపి నేత సుష్మా స్వరాజ్ సంతృప్తి చెందలేదు. చిదంబరం మాటలతో తాను సంతృప్తి చెందలేదని, పైగా తీవ్ర అసంతృప్తికి గురయ్యానని ఆమె గురువారం మీడియా ప్రతినిధులతో అన్నారు.

హోం మంత్రితో జరిగిన చర్చల వివరాలను వెల్లడించడానికి ఆమె నిరాకరించారు తనకు, చిదంబరానికి మధ్య చర్చల వివరాలను తాను చెప్పబోనని, లేఖలో రాసిన సెంటిమెంటును గౌరవించడం తన విధి అని ఆమె అన్నారు. తాను ఓ విషయంపై విజ్ఞప్తి చేశానని, దాన్ని చిదంబరం అంగీకరిస్తే మంచిదని ఆమె అన్నారు. తాను లేఖను లీక్ చేయలేదని, వెబ్ సైట్లలో అధికారికంగా అప్ లోడ్ చేశామని చెప్పినట్లు ఆమె తెలిపారు. వరుణ్ గాంధీకి భద్రత పెంచాలని కోరుతూ తాను రాసిన లేఖను చిదంబరం లీక్ చేశారని ఆమె బుధవారం ఆరోపించారు.