దారుణంగా వైయస్: చంద్రబాబు

హైదరాబాద్: నయానో, భయానో శాసనసభ్యులను తన దారిలోకి తెచ్చుకోవడంద్వారా ప్రధాన ప్రతిపక్షాన్ని నిర్వీర్యం చేయాలని కాంగ్రెస్‌ ప్రభుత్వం ప్రయత్నిస్తోందని తెలుగుదేశం పార్టీ అధ్యక్షుడు నారా చంద్రబాబునాయుడు ధ్వజమెత్తారు. తన ఎత్తుగడలకు లొంగని ఎమ్మెల్యేలపై తప్పుడు కేసులు బనాయించి మానసికంగా వేధిస్తోందని విమర్శించారు. ఇందులో భాగంగానే కొవ్వూరు ఎమ్మెల్యే రామారావుపై తప్పుడు కేసులు పెట్టి వేధిస్తోందని, ఆయనను అరెస్టు చేసేందుకు ప్రభుత్వం రంగం సిద్ధం చేస్తోందని గురువారమిక్కడ గవర్నరు ఎన్‌.డి.తివారీకి చంద్రబాబు ఫిర్యాదు చేశారు. ఎమ్మెల్యే రామారావుపై పెట్టిన తప్పుడు కేసు విషయంలో రాజ్యాంగ పరిరక్షకుడిగా జోక్యం చేసుకుని న్యాయం చేయాలని కోరారు. తమ పార్టీ ఎమ్మెల్యేలు, పార్టీ నాయకులతో కలిసి చంద్రబాబు గవర్నరుకు వినతిపత్రం సమర్పించారు.

ఎలాంటి సాక్ష్యాధారాలు లేకుండా, బాధితుల నుంచి ఫిర్యాదు లేకుండా రామారావుపై అత్యాచారం, హత్యానేరాల కింద కేసు నమోదు చేశారని, ఇంతకన్నా దారుణముంటుందా? అని కేసు విషయాన్ని గవర్నరు దృష్టికి చంద్రబాబు తీసుకెళ్లారు. కాంగ్రెస్‌ పార్టీకి చెందిన పిల్లి డేవిడ్‌రాజు, 'సాక్షి' పత్రిక విలేకరి శ్యామలరావు, మరికొంతమంది కలిసి రామారావుపై అత్యాచారం, హత్య వదంతులు పుట్టించారని తెలిపారు. ఎవరో తనకు చెప్పారంటూ పిల్లి డేవిడ్‌రాజు ఇచ్చిన ఫిర్యాదుపై కేసు నమోదు చేశారంటూ రామారావుపై పెట్టిన కేసు పూర్వాపరాలు, అనంతరం జరిగిన పరిణామాలను గవర్నరుకు వివరించారు. ముఖ్యమంత్రి రాజశేఖరరెడ్డి 'ఆపరేషన్‌ ఆకర్ష' పేరుతో తమ పార్టీ ఎమ్మెల్యేలను ప్రలోభపెడుతున్నారని, వినకపోతే వేధింపులకు గురిచేస్తున్నారని, అప్పటికీ లొంగకపోతే ఇలా తప్పుడు కేసులు బనాయించి మానసికంగా బాధిస్తున్నారని చంద్రబాబు తెలిపారు. రామారావు కేసు విషయంలో ముఖ్యమంత్రి పేషీ నుంచే అపాయింట్‌మెంట్స్‌ ఇచ్చి అధికారులకు ఆదేశాలు జారీ చేస్తున్నారని ఆరోపించారు.