చిరుపై సందేహం: టిడిపిలోకి గౌడ్?

హైదరాబాద్‌: ప్రజారాజ్యం పార్టీ నాయకుడు టి.దేవేందర్ గౌడ్ తెలుగుదేశం పార్టీలో తిరిగి చేరనున్నట్లు వార్తలు వస్తున్నాయి. చిరంజీవి కాంగ్రెసుకు ప్రత్యామ్నాయంగా ఎదుగుతారనే నమ్మకం లేకపోవడం వల్లనే ఆయన తెలుగుదేశంలో చేరాలని అనుకుంటున్నట్లు చెబుతున్నారు. తెలుగుదేశం పార్టీకి రాజీనామా చేసి ప్రజారాజ్యంలో చేరిన నేతలంతా తిరిగి సొంత గూటికి చేరుకునే ఆలోచనలో ఉన్నట్లు ప్రచారం జరుగుతోంది. దీనిపై ప్రజారాజ్యం సీనియర్ నేత పెద్దిరెడ్డి మధ్యవర్తిత్వం నడుపుతున్నట్లు తెలుస్తోంది. ఈ మేరకు దేవేందర్ గౌడ్, పెద్దిరెడ్డి ఇటీవల తెలుగుదేశం పార్టీ అధ్యక్షుడు నారా చంద్రబాబునాయుడిని ఆయన నివాసంలో రహస్యంగా కలిసినట్లు చెబుతున్నారు. ఈ సమావేశంలో తెలుగుదేశంలో ఆయన చేరే విషయం ఖరారైనట్లు సమాచారం. ఈ మధ్య కాలంలోనే ఆయన తన అనుచరులతో తెలుగుదేశంలో చేరే అవకాశం ఉందని చెబుతున్నారు.

కాంగ్రెసును ఎదుర్కోవడానికి తెలుగుదేశం పార్టీతో కలిసి పని చేయాలని దేవేందర్ గౌడ్ ప్రజారాజ్యం అధినేత చిరంజీవితో వాదిస్తూ వచ్చారు. అయితే దీనికి చిరంజీవి అంగీకరించలేదు. కాంగ్రెసు, తెలుగుదేశం పార్టీలకు సమ దూరం పాటించాలనే ఉద్దేశంతో చిరంజీవి ఉన్నారు. అధికార పార్టీని, ప్రధాన ప్రతిపక్షాన్ని ఒకే గాటన కట్టడం సరి కాదని దేవేందర్ గౌడ్ వాదిస్తూ వస్తున్నారు. ఈ స్థితిలో కాంగ్రెసుకు ప్రత్యామ్నాయంగా ప్రజారాజ్యం పార్టీ బలోపేతమవుతుందనే నమ్మకం కూడా లేకుండా పోయింది. దానికి తోడు, అవసరం వస్తే ప్రజారాజ్యం పార్టీ కాంగ్రెసుతో కలిసి పనిచేస్తుందేమోననే అనుమానాలు కూడా ఉన్నాయి. కాంగ్రెసుకు బద్దవ్యతిరేకి అయిన దేవేందర్ గౌడ్ ప్రజారాజ్యం పార్టీ వ్యవహారాలు రుచించడం లేదని తెలుస్తోంది. దీంతో ఆయన సొంత గూటికి చేరుకునేందుకు నిర్ణయం తీసుకున్నట్లు చెబుతున్నారు.