మద్దెలచెర్వు సూరికి క్షమాభిక్ష?

హైదరాబాద్: స్వాతంత్ర్య దినోత్సవం సందర్భంగా ఆగస్టు 15వ తేదీన ఖైదీలకు క్షమాభిక్ష ప్రసాదించే ఖైదీల్లో మద్దెలచెర్వు సూర్యనారాయణ రెడ్డి అలియాస్ మద్దెలచెర్వు సూరి కూడా ఉన్నట్లు వార్తలు వెలువడుతున్నాయి. రాష్ట్రంలోని 958 మంది ఖైదీలకు స్వాతంత్ర్య దినోత్సవం సందర్భంగా క్షమాభిక్ష ప్రసాదించి వారిని విడుదల చేయాలని రాష్ట్ర ప్రభుత్వం నిర్ణయించినట్లు సమాచారం. వీరిలో సూరితో పాటు మావోయిస్టు ఖైదీలు కూడా కొంత మంది ఉన్నట్లు చెబుతున్నారు.

హోంశాఖ ప్రిన్సిపిల్ కార్యదర్శి అజయ్ మిశ్రా నేతృత్వంలోని కమిటీ సమావేశమై విడుదల చేసే ఖైదీల జాబితాను మార్గదర్శక సూత్రాలకు అనుగుణంగా సిద్ధం చేసినట్లు సమాచారం. ఈ నెల 10వ తేదీన కమిటీ రాష్ట్ర ప్రభుత్వానికి నివేదిక సమర్పించనుంది. ఈ నెల 12వ తేదీన విడుదల చేయాల్సిన ఖైదీల జాబితాను రాష్ట్ర ప్రభుత్వం గవర్నరుకు పంపుతుంది. ఈ నెల 15వ తేదీన గవర్నర్ వారిని విడుదల చేస్తారు.