ముంబై దాడులు: వ్యాపారి అరెస్టు

ఇస్లామాబాద్: ముంబై దాడుల కేసులో పాకిస్తాన్ మరో కీలక వ్యక్తిని ఆరెస్టు చేసినట్లు తెలుస్తోంది. ముంబై దాడుల కుట్రను అమలు చేయడానికి ఆర్థిక సహాయం చేసిన సౌదీ అరేబియాకు చెందిన పాకిస్తాన్ వ్యాపారి జమీల్ అహ్మద్ ను అరెస్టు చేసినట్లు వార్తలు వస్తున్నాయి. జమీల్ ను ఫెడరల్ బ్యూరో ఆఫ్ ఇన్వెస్టిగేషన్ ఈ నెల 5వ తేదీన అదుపులోకి తీసుకున్నట్లు తెలుస్తోంది. అయితే ఈ విషయాన్ని ఇస్లామాబాద్ అధికారికంగా ధృవీకరించడం లేదు.

ముంబై దాడుల నిందితులకు సంబంధించి భారత్ జూలై 11వ తేదీన పాకిస్తాన్ కు ఒక నివేదికను అందజేసింది. అందులో జమీల్ ఖాన్ అనే పేరు ఉంది. ఆ జమీల్ ఖానే జమీల్ అహ్మద్ అయి ఉంటాడని భావిస్తున్నారు. ముంబై దాడుల కేసులో పాకిస్తాన్ అరెస్టు చేసిన ఐదుగురిలో ఒక్కడైన షాహిద్ జమీల్ రియాజ్ కు జమీల్ అహ్మద్ 10 నుంచి 15 లక్షల రూపాయలు బదిలీ చేసినట్లు చెబుతున్నారు. జమీల్ అహ్మద్ రియాజ్ కు పంపిన డబ్బులతో యమా మోటార్ ఇంజన్ కొన్నారు. దీన్నే ముంబైలో స్వాధీనం చేసుకున్నారు. ఆ డబ్బుతోనే లైఫ్ జాకెట్లను, పడవలను కొనుగోలు చేశారు.