బాబు ఆదర్శం కారు: వైయస్

హైదరాబాద్: మాజీ ముఖ్యమంత్రి, తెలుగుదేశం పార్టీ అధ్యక్షుడు నారా చంద్రబాబు నాయుడు తనకు ఆదర్శం కారని ముఖ్యమంత్రి డాక్టర్ వైయస్ రాజశేఖర రెడ్డి అన్నారు. చంద్రబాబు తన హయాంలో చేసిన ఆకస్మిక తనిఖీలకు, తాను తలపెట్టిన రచ్చబండ కార్యక్రమాలకు పోలిక లేదని ఆయన గురువారం మీడియా ప్రతినిధులతో అన్నారు. గ్రామస్థాయి పరిపాలన సమర్థంగా జరగాలనే ఉద్దేశంతో తాను రచ్చబండ కార్యక్రమాన్ని తలపెట్టినట్లు ఆయన తెలిపారు. గ్రామస్థాయిలో కాంగ్రెసు పార్టీని బలోపేతం చేయడానికి ప్రయత్నిస్తామని ఆయన చెప్పారు.

అధికారం చేపట్టి వంద రోజులు అయిన సందర్భంగా పండుగల చేసుకోవడానికి తాము సినిమావాళ్లం కాదని ఆయన వ్యాఖ్యానించారు. వచ్చే లోకసభ ఎన్నికలపై ఇప్పటి నుంచే దృష్టి పెడతామని ఆయన అన్నారు. రాష్ట్రంలో 42 లోకసభ స్థానాలు, కేంద్రంలో 273 సీట్లు సాధించడమే లక్ష్యమని వైయస్ అన్నారు. వైయస్ రాజశేఖర రెడ్డిని ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ శాసనసభ ఆవరణలో కలుసుకున్నారు.