ఎట్టకేలకు కరువుపై కదిలిన ప్రభుత్వం

హైదరాబాద్: ఎట్టకేలకు కరువుపై రాష్ట్ర ప్రభుత్వం కదిలింది. రాష్ట్రంలోని 21 జిల్లాల్లో 971 మండలాలను ముఖ్యమంత్రి కె. రోశయ్య కరవు ప్రాంతాలుగా ప్రకటించారు. శ్రీకాకుళం, హైదరాబాద్ జిల్లాల్లో కరువు మండలాలను ప్రకటించలేదు. టెక్కలి ఉప ఎన్నిక తర్వాత శ్రీకాకుళం జిల్లాలోని కరవు ప్రాంతాలను ప్రకటిస్తామని రోశయ్య బుధవారం మీడియా ప్రతినిధుల సమావేశంలో చెప్పారు. కరువు జిల్లాల్లో కరువు సహాయక చర్యల కోసం 4 వేల కోట్ల రూపాయల ఆర్థిక సహాయాన్ని కోరినట్లు, అదనపు సహాయం అందించడానికి కేంద్రం సుముఖంగా ఉన్నట్లు ఆయన తెలిపారు. కేంద్ర నిధులు అందగానే కరువు సహాయ చర్యలకు ప్రణాళిక రూపొందిస్తామని ఆయన చెప్పారు.

వ్యవసాయ కూలీలకు అదనపు పని దినాలు కల్పించడానికి గ్రామీణాభివృద్ధి శాఖ చర్యలు తీసుకుంటుందని ఆయన చెప్పారు. కరువు ప్రాంతాలను ప్రకటించడం వల్ల రైతులకు ఇన్ పుట్ సబ్సీడి లభిస్తుందని ఆయన అన్నారు. రైతుల రుణాలను రీషెడ్యూల్ చేసి కొత్త రుణాలు ఇస్తామని చెప్పారు. పశు సంరక్షణకు అదనంగా 350 కోట్ల రూపాయలు కేటాయిస్తున్నట్లు రోశయ్య చెప్పారు. వ్యవసాయానికి 417 కోట్ల రూపాయలు కేటాయిస్తున్నట్లు చెప్పారు. ఉద్యాన వనానికి 320 కోట్ల రూపాయలు కేటాయిస్తున్నట్లు చెప్పారు. అదనంగా 13,500 రుణాలు మంజూరు చేస్తున్నట్లు చెప్పారు.