ఇడుపులపాయలో వైయస్ జగన్

కడప: రాజ్యసభ సభ్యుడు, కాంగ్రెసు నాయకుడు వైయస్ జగన్మోహన్ రెడ్డి ఆదివారం ఉదయం ఇడుపులపాయలో తండ్రి వైయస్ రాజశేఖర రెడ్డి సమాధి వద్ద పుష్పగుచ్ఛం ఉంచి నివాళులు అర్పించారు. ఆయన శనివారం రాత్రి వెంకటాద్రి ఎక్స్ ప్రెసులో హైదరాబాద్ నుంచి బయలు దేరి ఇడుపులపాయ చేరుకున్నారు. రైల్వే స్టేషన్లలో ఆయనను ప్రజలు పలుకరించి సానుభూతి తెలిపారు. ఆయనను చూడడానికి ప్రతి స్టేషనుకూ ఆయనను చూడడానికి పెద్దయెత్తున ప్రజలు వచ్చారు.

జగన్ ఆదివారం ఉదయం చర్చిలో ప్రార్థనలు కూడా చేశారు. కుటుంబ సభ్యులతో ఇడుపులపాయ వచ్చిన జగన్ నాలుగు రోజుల పాట ఇక్కడే ఉంటారు. ఆయనను చూడడానికి ఇడుపులపాయకు ప్రజలు తరలి వస్తున్నారు. కాగా, నాలుగు రోజుల తర్వాత హైదరాబాద్ తిరిగి వచ్చే ముందు ఆయన వైయస్ రాజశేఖర రెడ్డి హెలికాప్టర్ ప్రమాదం జరిగిన పావురాలగుట్టను సందర్శిస్తారు.