అమితాబ్ కు ఎస్ఎంఎస్ బెదిరింపులు

ముంబై: ఇటు హిందూ దేవాలయాన్ని, అటు దర్గాను సందర్శించడం పట్ల తనను బెదిరిస్తూ ఒక ఆగంతకుడు ఎస్ఎంఎస్ సందేశం పంపినట్లు బాలీవుడ్ నటుడు అమితాబ్ బచ్చన్ తెలిపారు. తన బ్లాగ్ లో తన మతపరమైన విషయాల గురించి రాశారు. ఈ సందర్భంగా ఆయన ఈ బెదిరింపు విషయం తెలిపారు. తాను ముస్లిం దర్గాను, హిందూ దేవాలయాన్ని సందర్శిస్తానని, దీనిపై తనను విమర్సిస్తూ తనకు మెసెజ్ వచ్చినట్లు ఆయన చెప్పారు.

గురువారం తెల్లవారు జామున అమితాబ్ హజీ అలీ దర్గా సందర్శించారు. ఆ తర్వాత సమీపంలోని దేవాలయానికి వెళ్లారు. ఆయన చిన్నపాటి దర్గాకు కూడా వెళ్లి సిద్ధివినాయక ఆలయాన్ని సందర్శించుకున్నారు. బెదిరింపులు వచ్చినప్పటికీ తాను ఆ ఆచారాన్ని మానబోనని ఆయన చెప్పారు. ధైర్యం, పట్టుదల ఉంటే తనను ఆపాలని ఆయన హెచ్చరించారు. దర్గా, ఆలయాలను రెండింటినీ సందర్శించడం వల్ల అలాదీన్ సినిమా విజయం కాదని కూడా ఆ వ్యక్తి హెచ్చరించినట్లు ఆయన తెలిపారు.