కనకదుర్గ గుడి వద్ద లైంగిక వేధింపులు

విజయవాడ: కనకదుర్గ గుడిలో ఇద్దరు సిబ్బంది లైంగిక కార్యానికి పాల్పడుతూ కెమెరాలకు దొరికిపోయిన విషయం తెలిసిందే. ప్రైవేట్ సెక్యూరిటీలో ఉన్న ఇద్దరు మహిళలను లైంగికంగా వేధిస్తున్న వ్యక్తి ఉదంతం వెల్లడయింది. ఆ వివరాలివి....దుర్గగుడి భద్రత, భక్తుల సౌకర్యాల నిమిత్తం ఆలయ ఉన్నతాధికారులు ప్రైవేట్‌ సెక్యూరిటీ సిబ్బందిని నియమించి వారికి ఆలయ ప్రాంగణంలో ఒక కార్యాలయాన్ని కేటాయించారు. దుర్గగుడిలో సుమారు వందమంది ప్రైవేట్‌ సిబ్బంది ఉండగా వారిలో మహిళలు 20మంది ఉన్నారు. వీరికి రమణ అనే వ్యక్తిని ఇన్‌ చార్జిగా నియమించింది. అయితే ఇతను మహిళా సెక్యూరిటీ సిబ్బంది పట్ల అసభ్యంగా మాట్లాడుతూ వేధిస్తున్నాడని బాధితులు ఆరోపిస్తున్నారు. ఈ విషయం సంస్థ యాజమాన్యానికి తెలిపి నప్పటికీ యాజమాన్యం రమణకే మద్దతు పలుకుతుందని బాధితులు ఆవేదన వ్యక్తం చేస్తున్నారు.

ఇటీవల ఒక సెక్యూరిటీగార్డు భవానీదీక్ష స్వీకరించి విధులకు రాగా ఆ భవానీపై అసభ్యకరంగా మాట్లాడ డంతో అతను విధుల నుంచి తప్పుకున్నట్టు తెలిపారు. ఆలయంలోని సెక్యూరిటీ కార్యాలయంలో అసాంఘిక కార్యకలాపాలు జరుగుతున్నాయని స్థానిక సిబ్బంది ఆలయ ఈవో దృష్టికి తీసుకువెళ్ళారు. దీంతో ఈవో ఓపీడీఎస్‌ కార్యాలయాన్ని ఖాళీ చేయించాలని ఆదేశించడంతో సంబంధిత అధికారులు కార్యాలయాన్ని ఖాళీ చేయించారు. ఆలయంలో భక్తులు కొబ్బరికాయలు కొట్టే క్యూల వద్ద, కేశఖండన శాల వద్ద, ఘాట్‌రోడ్డులో కారు నిలుపుదల స్థలం వద్ద అక్రమంగా డబ్బులు వసూలు చేస్తున్నారని వీరిపై ఆలయ సిబ్బంది ఆరోపిస్తున్నారు. ఆలయ ఉన్నతాధికారులు ప్రైవేట్ సెక్యూరిటీ సిబ్బందిపై దృష్టి సారించాల్సిన అవసరం ఉందని పలువురు కోరుతున్నారు.