నేడుగుమ్మడి అంత్యక్రియలు: సొంతపొలంలోనే

కొల్లూరు: ప్రముఖ సినీనటుడు గుమ్మడి వెంకటేశ్వరరావు భౌతికకాయాన్ని ఆయన స్వస్థలమైన కొల్లూరు మండలం రావికంపాడుకు గురువారం తీసుకురానున్నారు. ఛాతీనొప్పితో అస్వస్థతకు గురైన గుమ్మడి మంగళవారం రాత్రి పొద్దుపోయాక కన్నుమూసిన విషయం తెలిసిందే. ఆయన భౌతికకాయాన్ని హైదరాబాద్‌ లోని నటీనటులు, ఇతరప్రముఖుల సందర్శనార్ధం బుధవారం అక్కడే ఉంచారు. గురువారం ఉదయం నుంచి మధ్యాహ్నం వరకు రావికంపాడులోని గుమ్మడి స్వగృహంలో ప్రజలు సందర్శించేందుకు వీలుగా ఆయన భౌతికకాయాన్ని ఉంచుతామని బంధువులు తెలిపారు. మధ్యాహ్నం నుంచి అక్కడకు సమీపంలోని గుమ్మడి అత్తగారి ఊరైన ముసలిపాడులోని ఆయన సొంత వ్యవసాయక్షేత్రంలో అంత్యక్రియలు నిర్వహిస్తారు. ఇందుకోసం ఏర్పాట్లు చేపట్టారు. మొదట హైదరాబాద్ పంజాగుట్ట స్మశాన వాటికలో అంత్యక్రియలు చేయాలనుకున్నా చివరికి ఆయన సొంత పొలంలోనే చేయాలని నిర్ణయించారు.

గుమ్మడి తల్లిదండ్రులు గుమ్మడి బసవపున్నయ్య, బుచ్చమ్మ. ఐదుగురు బిడ్డల్లో గుమ్మడి వెంకటేశ్వరరావు పెద్దకుమారుడు. ఈయన విద్యాభ్యాసం, కొల్లూరు, గుంటూరులో జరిగింది. కొల్లూరు జెడ్పీ హైస్కూల్లో చదువుతుండగా తెలుగుపండిట్‌ జాష్టి శ్రీరాములు తెలుగుభాష, సంస్కృతులపై ఆయనకు స్ఫూర్తిదాతగా నిలిచారు. ముసలిపాడు గ్రామానికి చెందిన లకీసరస్వతితో వివాహంకాగా, భార్య మేనమామ అయిన వట్టికూటి రామకోటేశ్వరరావు ఆయనను ఎంతగానో ప్రోత్సహించారు. గుమ్మడికి ఏడుగురు సంతానం. వీరిలో ఐదుగురు అమ్మాయిలు, ఇద్దరుఅబ్బాయిలు. వీరిలో ఇద్దరు అమెరికాలో ఉంటున్నారు. మిగిలినవారు వివిధ వృత్తుల్లో స్థిరపడ్డారు. 'అగ్నిపూలు' సినిమాలో నటించిన తర్వాత ఆ సినిమాలో ఉన్న తంగేడుచెట్టును తన స్వగృహం వద్ద నాటాలని భావించి, తల్లి బుచ్చమ్మతో తంగేడు మొక్క నాటించినట్టు ఆయన చెల్లెలు కామినేని సీతామహాలకి తెలిపారు. రావికంపాడులో తనకు ఎంతో ఇష్టమైన గ్రంథాలయానికి సొంత భవనం నిర్మించారు. దళితవాడలో చర్చి, కొల్లూరు జెడ్పీ హైస్కూల్‌లో చదువుకున్నందుకు గుర్తుగా స్కూల్‌ ఆవరణలో 'గుమ్మడి కళామందిర్‌'ను ఆయన నిర్మించారు.