ప్రమాదం: శిథిలాల కింద పాప శవం?

హైదరాబాద్: సూర్య కిరణ్ యుద్ధ విమానం ప్రమాదంలో కూలిన భవనం శిథిలాల కింద ఒక పాప మృతదేహాన్ని అధికారులు కనుక్కున్నట్లు సమాచారం. పాప శవంతో పాటు మరో మృతదేహాన్ని కూడా అధికారులు వెలికి తీసినట్లు తెలుస్తోంది. విమానం శకలాలను వైమానిక అధికారులు సేకరిస్తున్నారు. ప్రమాదంలో మరణించిన పైలట్ నాయర్, కోపైలట్ మౌర్య మృతదేహాలను సికింద్రాబాదులో గల తిర్మలగిరి ఆర్మీ ఆస్పత్రికి తరలించారు. సహాయక చర్యలకు భవంతి రెండో అంతస్ధును కూల్చేయాలని అధికారులంటున్నారు.

యుద్ధ విమానం ప్రమాదంపై ముఖ్యమంత్రి కె. రోశయ్య తీవ్ర దిగ్భ్రాంతి వ్యక్తం చేశారు. మృతుల కుటుంబాలకు ఆయన సానుభూతి తెలిపారు. గాయపడినవారికి మెరుగైన చికిత్స అందించాలని ఆయన అధికారులను ఆదేశించారు. ఈ ప్రమాదంలో ఏడుగురు గాయపడ్డారు. ప్రమాద స్థలాన్ని తెలుగుదేశం పార్టీ అధ్యక్షుడు నారా చంద్రబాబు నాయుడు సందర్శించారు. ప్రమాదంపై ఆయన తీవ్ర విచారం వ్యక్తం చేశారు.