శాలిబండ కాల్పులు వికారుద్దీన్ పనే

హైదరాబాద్: హైదరాబాదులోని శాలిబండలో పోలీసు కానిస్టేబుల్ పైకి కాల్పులు జరిపింది ఉగ్రవాది వికారుద్దీనే అని పోలీసులు భావిస్తున్నారు. శాలిబండలో ఉగ్రవాదులు జరిపిన కాల్పుల్లో రమేష్ అనే పోలీసు కానిస్టేబుల్ మరణించిన విషయం తెలిసిందే. వికారుద్దీన్ గతంలో సైదాబాదులో రామారావు అనే పోలీసు కానిస్టేబుల్ పై కాల్పులు జరిపాడు. అప్పటి నుంచి అతను పరారీలో ఉన్నాడు. వికారుద్దీన్ ను పట్టుకుని తీరుతామని రాష్ట్ర హోం మంత్రి సబితా ఇంద్రా రెడ్డి చెప్పారు.

శాలిబండ కాల్పులకు కొన్ని సంస్థలపై, వ్యక్తులపై అనుమానాలున్నాయని, ఆ విషయాన్ని ఛేదిస్తామని హైదరాబాదు నగర పోలీసు కమిషనర్ ఎకె ఖాన్ అన్నారు. కాల్పుల ఘటనపై విచారణకు ప్రత్యేక బృందాలను ఏర్పాటు చేసినట్లు ఆయన తెలిపారు. పాతబస్తీలో పోలీసులు ఇప్పటికే 20 మందిని అదుపులోకి తీసుకుని విచారిస్తున్నారు. కాల్పుల ఘటనకు రెండు ఉగ్రవాద సంస్థలు కారణమని అనుమానిస్తున్నారు.