వైయస్ జగన్ కు కౌంట్ డౌన్ మొదలైనట్లే

రాజమండ్రి: పార్టీలో ఉండాలా, వెళ్లిపోవాలా అనే విషయంలో నిర్ణయం తీసుకోవడానికి కడప పార్లమెంటు సభ్యుడు వైయస్ జగన్ కు కౌంట్ డౌన్ ప్రారంభమైనట్లేనని భావిస్తున్నారు. జగన్ కు అధికార ప్రతినిధిగా వ్యవహరిస్తున్న ప్రదేశ్ కాంగ్రెసు కమిటీ (పిసిసి) ప్రధాన కార్యదర్శి అంబటి రాంబాబుపై సస్పెన్షన్ వేటు వేయడం జగన్ కు హెచ్చరికే అని అంటున్నారు. తనపై గానీ తన వర్గంపై గానీ ఇప్పట్లో చర్య తీసుకోవడానికి అధిష్టానం సాహసించదని వైయస్ జగన్ వేసుకున్న అంచనా తారుమారైంది. ముఖ్యమంత్రి రోశయ్యపై విమర్శలు చేశారనే ఆరోపణపై అంబటి రాంబాబును అధిష్టానం సస్పెండ్ చేసింది. అధిష్టానం అంతరంగం తెలిసిపోవడంతో జగన్ తీవ్ర ఒత్తిడికి గురైనట్లు కనిపిస్తున్నారు. తాను ఎక్కువ మాట్లాడితే బాగుండదని ఆయన అన్నారు. తాను ఏం తప్పు చేశానని, పైన దేవుడున్నాడు, తండ్రి ఆశీస్సులున్నాయని ఆయన అన్నారు.

జగన్ యాత్రకు ప్రాధాన్యం తగ్గించాలనే ఉద్దేశంతోనే అధిష్టానం ఉంది. యాత్రను చూపించి జగన్ పై చర్య తీసుకోవడానికి కూడా సిద్ధంగా లేదు. జగనే ఏదో ఒక నిర్ణయం తీసుకునే దిశగా క్రమంగా పరిస్థితులను నెడుతోంది. అంబటి రాంబాబుపై చర్య ఇందులో భాగమే. ఈ చర్యతో జగన్ వర్గంలో తీవ్ర నిరాశ నెలకొంది. అధిష్టానం ఎప్పుడు ఏ నిర్ణయం తీసుకుంటుందోననే భయం నెలకొంది. పార్టీలో ఉంటూనే ఓదార్పు యాత్రను కొనసాగించాలనే ఉద్దేశంతో జగన్ ఉన్నట్లు చెబుతున్నారు. జగన్ నిర్ణయించుకున్న ప్రకారం ఓదార్పు యాత్ర పూర్తి కావడానికి మరో ఎనిమిది నెలలు పడుతుంది. ఓదార్పు యాత్ర పూర్తయిన తర్వాత పరిస్థితిని బట్టి నిర్ణయం తీసుకునే ఆలోచనలో జగన్ ఉన్నారు. శ్రీకృష్ణ కమిటీ నిర్ణయం తర్వాత రాష్ట్ర పరిస్థితి మారే విషయంపై కూడా జగన్ నిర్ణయం ఆధార పడి ఉండవచ్చు. మొత్తం మీద, జగన్ తీవ్రమైన ఒత్తిడిలో పడ్డారనేది మాత్రం నిజం.