అసెంబ్లీలోని మహాత్మా గాంధీ సాక్షిగా టిడిపి మహా ధర్నా

హైదరాబాద్: బాబ్లీ ప్రాజెక్టు విషయంలో మహారాష్ట్ర ప్రభుత్వ తీరును నిరసిస్తూ తెలుగుదేశం పార్టీ శాసనసభ్యులు, ఎమ్మెల్సీలు బుధవారం శాసనసభ ఆవరణలోని మహాత్మా గాంధీ విగ్రహం వద్ద ధర్నాకు దిగారు. ఈ ధర్నా సందర్భంగా అసెంబ్లీ వద్ద పెద్ద యెత్తున పోలీసులు మోహరించారు. శాసనసభ్యులు, ఎమ్మెల్సీను మాత్రమే పోలీసులు లోనికి అనుమతించారు. ఇతర నాయకులను, కార్యకర్తలను పోలీసులు అడ్డుకున్నారు.

పోలీసుల తీరుతో తెలుగుదేశం పార్టీ కార్యకర్తలు శాసనసభ ఎదుట రోడ్డుపై బైఠాయించారు. దాంతో ట్రాఫిక్ కు తీవ్ర అంతరాయం ఏర్పడింది. రాస్తారోకోకు దిగిన తెలుగుదేశం పార్టీ కార్యకర్తలను పోలీసులు అరెస్టు చేశారు. మహారాష్ట్ర ప్రభుత్వం బాబ్లీ ప్రాజెక్టు నిర్మాణాన్ని ఆపే వరకు ఆందోళన సాగిస్తామని తెలుగుదేశం శాసనసభ్యులు అంటున్నారు. తమ ఆందోళనలో ఏ విధమైన రాజకీయం లేదని వారు చెబుతున్నారు.