ప్రతి ఒక్కరికీ మేలు చేసిన మహానుభావుడు వైయస్: జగన్

కాకినాడ: ప్రతి ఒక్కరికీ ఏదో ఒక రూపాన మేలు చేసిన మహానుభావుడు వైయస్ రాజశేఖర రెడ్డి అని కాంగ్రెసు కడప పార్లమెంటు సభ్యుడు వైయస్ జగన్ అన్నారు. దివంగత నేత వైయస్ రాజశేఖర రెడ్డి ప్రతి చప్పుడులో ఉన్నారని ఆయన అన్నారు. ఈ రోజు చిరునవ్వుతో తాను ప్రజల ముందు నిలబడ్డానంటే వైయస్ అభిమానులు చూపుతున్న ఆదరాభిమానాలే కారణమని ఆయన అన్నారు.

ఓదార్పు యాత్రలో భాగంగా జగన్ మంగళవారం మధ్యాహ్నం తూర్పు గోదావరి జిల్లా తాళ్లరేవు చేరుకున్నారు. సంతపేటలో ఏర్పాటు చేసిన రాజశేఖర రెడ్డి విగ్రహాన్ని ఆయన ఆవిష్కరించి క్షీరాభిషేకం చేశారు. అక్కడికి వచ్చిన ప్రజలను ఉద్దేశించి ఆయన ప్రసంగించారు. ఇప్పటి వరకు తూర్పు గోదావరి జిల్లాలో 263 వైయస్ విగ్రహాలను జగన్ ఆవిష్కరించారు.