చంద్రబాబుకే పిచ్చి, మా తడాఖా చూపిస్తాం: కెసిఆర్

హైదరాబాద్: పిచ్చి పట్టింది తనకు కాదని తెలుగదేశం పార్టీ అధ్యక్షుడు నారా చంద్రబాబు నాయుడికేనని తెలంగాణ రాష్ట్ర సమితి (తెరాస) అధ్యక్షుడు కె చంద్రశేఖర రావు వ్యాఖ్యానించారు. చంద్రబాబువి మూర్ఖపు వాదనలని ఆయన శనివారం మీడియా ప్రతినిధుల సమావేశంలో అన్నారు. రాయలసీమవాళ్లు ప్రత్యేక రాష్ట్రం అడుగుతున్నారు కదా, దమ్ముంటే చంద్రబాబు చేయాలని ఆయన అన్నారు. తెలుగుదేశం పార్టీ శాసనసభ్యులకు రాజీనామా చేసే దమ్ములు లేవని, ఈ ముఖాలేనా రాజీనామాలు చేసేది అని ఆయన అన్నారు. డిసెంబర్ 31వ తేదీ తర్వాత తమ తడాఖా ఏమిటో చూపిస్తామని ఆయన అన్నారు. బాబ్లీ ప్రాజెక్టుపై తమకు ఒక వైఖరి ఉందని, బాబ్లీకి వ్యతిరేకంగా తొలుత గొంతెత్తి తామేనని ఆయన చెప్పారు. బాబ్లీ డ్రామా ఆడినా చంద్రబాబును ప్రజలు నమ్మలేదని ఆయన అన్నారు. ఉప ఎన్నికల్లో తెలుగుదేశం పార్టీ అభ్యర్థులకు సర్పంచుకు వచ్చిన ఓట్లు కూడా రాలేదని ఆయన అన్నారు.

తెలంగాణ రాష్ట్రం ఏర్పాటు డిమాండ్ దేశద్రోహమని సీమాంధ్ర మంత్రులు శ్రీకృష్ణ కమిటీ ముందు వ్యాఖ్యానించడంపై ఆయన తీవ్రంగా మండిపడ్డారు. అన్ని ప్రాంతాలకు మంత్రులై ఉండి ఒక ప్రాంతానికి అనుకూలంగా వారు ఎలా మాట్లాడుతారని ఆయన ప్రశ్నించారు. ఆ రకంగా వారు రాజ్యాంగంపై చేసిన ప్రమాణాన్ని ఉల్లంఘించారని ఆయన అన్నారు. వారికి లజ్జ, సిగ్గు, నిబద్ధత ఉండాలని ఆయన అన్నారు. తెలంగాణపై సీమాంధ్ర మంత్రులది దురహంకార వైఖరి అని ఆయన వ్యాఖ్యానించారు. వారు తెలంగాణ ప్రజలకు క్షమాపణలు చెప్పాలని ఆయన డిమాండ్ చేశారు. లేదంటే గవర్నర్ వారిని మంత్రి వర్గం నుంచి తొలగించాలని ఆయన అన్నారు.