ఓదార్పుపై సోనియా సూచన సరి కాదు: బాలినేని శ్రీనివాస రెడ్డి

ఒంగోలు: తమ కాంగ్రెసు పార్టీ కడప పార్లమెంటు సభ్యుడు వైయస్ జగన్ ఓదార్పు యాత్రపై పార్టీ అధ్యక్షురాలు సోనియా గాంధీ సూచన సరి కాదని రాష్ట్ర గనుల శాఖ మంత్రి బాలినేని శ్రీనివాస రెడ్డి అన్నారు. ప్రకాశం జిల్లాలో జగన్ ఓదార్పు యాత్రకు ఏర్పాట్లు చేస్తున్న ఆయన శుక్రవారం మీడియా ప్రతినిధులతో మాట్లాడారు. బాధితులను ఒక్క చోటికి రప్పించి సాయం అందించాలని సోనియా సూచించారని, ఆ సూచన సరైంది కాదు కాబట్టే జగన్ బాధితుల ఇళ్లకు వెళ్లి పరామర్శిస్తున్నారని ఆయన అన్నారు.

జగన్ ఓదార్పు యాత్ర విషయంలో కొత్త విషయమేమీ లేదని ఆయన అన్నారు. ప్రకాశం జిల్లాలో జగన్ ఓదార్పు యాత్ర కొనసాగుతుందని ఆయన స్పష్టం చేశారు. ప్రజలే వైయస్ రాజశేఖర రెడ్డి విగ్రహాలను ఏర్పాటు చేసుకుంటున్నారని ఆయన చెప్పారు. ఓదార్పు యాత్రలో పాల్గొనకూడదని ముఖ్యమంత్రి రోశయ్య బాలినేనికి గురువారం సూచించారు. అయితే బాలినేని అందుకు అంగీకరించలేదు.