రేపే వైయస్ జగన్ కు డెడ్ లైన్: వినకుంటే షోకాజ్ జారీ

హైదరాబాద్: కడప పార్లమెంటు సభ్యుడు వైయస్ జగన్ కు కాంగ్రెసు అధిష్టానం శుక్రవారం డెడ్ లైన్ పెట్టుకున్నట్లు తెలుస్తోంది. ప్రకాశం జిల్లాలో ఓదార్పు యాత్ర ఆపాలని ఆదేశిస్తూ అధిష్టానం శుక్రవారం అధికారిక ప్రకటన విడుదల చేసే అవకాశం ఉంది. జగన్ తమ మాట వినకపోతే షోకాజ్ నోటీసు జారీ చేసే అవకాశాలున్నాయి. వైయస్ రాజశేఖర రెడ్డి ప్రథమ వర్ధంతి దాటిన తర్వాత జగన్ పై చర్యలు తీసుకునేందుకు అధిష్టానం సిద్ధపడుతోందనే వార్తలు వెలువడుతూనే ఉన్నాయి. అందుకు అనుగుణంగానే అధిష్టానం వ్యవహరిస్తోంది.

వైయస్ జగన్ కు నచ్చజెప్పేందుకు చివరి ప్రయత్నంగా కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ దూతగా వ్యవహరించే అవకాశం ఉన్నాయి. మొయిలీ మాట కూడా జగన్ వినకుంటే చర్యలు తీసుకునేందుకు పార్టీ అధిష్టానం సిద్ధపడినట్లు చెబుతున్నారు. అదే సమయంలో కాంగ్రెసు పార్టీ అధ్యక్షురాలిగా సోనియా గాంధీ ఎన్నిక కూడా గురువారమే జరుగుతోంది. ఆ ఎన్నిక పూర్తి కాగానే రాష్ట్రంలో పెను మార్పులకు సోనియా గాంధీ శ్రీకారం చుట్టే అవకాశాలున్నాయి. ముఖ్యమంత్రి కె. రోశయ్య మంత్రివర్గంలో మార్పులతో పాటు పార్టీలో కూడా మార్పులకు ఆమె కసరత్తు చేస్తారు. ఈలోగానే వైయస్ జగన్ వ్యవహారాన్ని తేల్చే ఉద్దేశంతో ఆమె ఉన్నట్లు చెబుతున్నారు.