ఉస్మానియా విశ్వవిద్యాలయంలో నలుగురు విద్యార్థుల ఆమరణ దీక్ష

హైదరాబాద్: ఎపిపిఎస్సీ గ్రూప్ -1 పరీక్షను వాయిదా వేయాలని డిమాండ్ చేస్తూ ఉస్మానియా విశ్వవిద్యాలయంలో నలుగురు విద్యార్థులు ఆమరణ నిరాహార దీక్షకు దిగారు. వారు శనివారం ఉదయం ఉస్మానియాలోని ఆర్ట్స్ కళాశాలలోని ఓ గదిలోకి వెళ్లి లోపలి నుంచి తలుపులు వేసుకుని ఆమరణ నిరాహాదీక్ష చేస్తున్నారు. తెలంగాణ వాటా తేల్చే వరకు పరీక్షను వాయిదా వేయాలని ఎపిపిఎస్సీ అంగీకరించకపోవడంతో వారు ఆమరణ నిరాహార దీక్ష చేపట్టాలనే నిర్ణయానికి వచ్చారు. దీంతో ఉస్మానియా విశ్వవిద్యాలయంలో తీవ్ర ఉద్రిక్తత నెలకొంది.

ఇదిలా వుంటే, ఉస్మానియా విశ్వవిద్యాలయం విద్యార్థుల జెఎసి హోం మంత్రి సబితా ఇంద్రారెడ్డిని కలిసి గ్రూప్ -1 పరీక్షలను వాయిదా వేయాలని కోరారు. మంత్రి సానుకూలంగా స్పందించినట్లు జెఎసి నాయకులు సుమన్, రాజారాం యాదవ్ మీడియా ప్రతినిధులతో చెప్పారు. ముఖ్యమంత్రి కె. రోశయ్యతో చర్చించిన తర్వాత గ్రూప్ -1 పరీక్షపై ప్రకటన చేస్తామని సబితా ఇంద్రారెడ్డి వారికి చెప్పారు. గ్రూప్ -1 పరీక్షను వాయిదా వేయాలని డిమాండ్ చేస్తూ ఒయు జెఎసి ఈ నెల 5వ తేదీన బంద్ కు పిలుపునిచ్చింది. పరీక్షను యధావిధిగా ఈ నెల 5వ తేదీన నిర్వహించాలని ఎపిపిఎస్సీ నిర్ణయించింది.