బయటికొచ్చిన గ్రూప్ వన్ పరీక్ష: ఉస్మానియాలో తీవ్ర ఉద్రిక్తత

హైదరాబాద్: ఉస్మానియా విశ్వవిద్యాలయం బిఇడి కాలేజీ సెంటర్ వద్ద తీవ్ర ఉద్రిక్తత నెలకొంది. ఎపిపిఎస్సీ గ్రూప్ వన్ పరీక్ష ప్రశ్నపత్రం బయటకు వచ్చింది. కొంత మంది అభ్యర్థులు ప్రశ్న పత్రం తీసుకుని బయటకు వచ్చారు. చాలా మంది అభ్యర్థులు ప్రశ్న పత్రాలను చించేసి బయటకు వచ్చారు. వారిని పోలీసులు అదుపు చేయలేకపోయారు. ఉస్మానియా విశ్వవిద్యాలయం జెఎసి నాయకులు పోలీసు బందోబస్తును ఛేదించుకుని సెంటర్ లోకి ప్రవేశించారు. వారి వెంట కాంగ్రెసు పార్లమెంటు సభ్యులు కూడా ఉన్నారు. కాంగ్రెసు పార్లమెంటు సభ్యులు మధు యాష్కీ, వినోద్, పొన్నం ప్రభాకర్ తదితరులు విద్యార్థులకు అండగా నిలిచారు.

ఉస్మానియా విశ్వవిద్యాలయం గేటు వద్ద కాంగ్రెసు పార్లమెంటు సభ్యులు ఆందోళనకు దిగారు. సికింద్రాబాదు పిజి కశాశాల వద్ద తీవ్ర ఉద్రిక్తత నెలకొంది. హైదరాబాదులోని పరీక్ష కేంద్రాల్లో అభ్యర్థుల హాజరు చాలా తక్కువగా ఉంది. ఉస్మానియా విశ్వవిద్యాలయం బిఇడి కాలేజీ సెంటర్ కేంద్రం వద్దకు వచ్చిన కాంగ్రెసు పార్లమెంటు సభ్యులను పోలీసులు అదుపులోకి తీసుకున్నారు. తెరాస శాసనసభ్యుడు ఈటెల రాజేందర్ ను కూడా పోలీసులు అరెస్టు చేశారు. ప్రశ్నపత్రాలతో విద్యార్థులు ఉస్మానియాలోని ఆర్ట్ర్స్ కళాశాల వద్ద ప్రదర్సిస్తున్నారు. నల్లగొండ జిల్లాలో కూడా పలువురు అభ్యర్థులు పరీక్షను బహిష్కరించారు. తెలంగాణవ్యాప్తంగా అభ్యర్థులు చాలా మంది పరీక్షలను బహిష్కరించారు.