ముఖం చూసి బొట్టు పెడుతున్నారు: జెఎసి నేత కోదండరామ్

హైదరాబాద్: ఎపిపిఎస్సీలో ముఖం చూసి బొట్టు పెడుతున్నారని తెలంగాణ రాజకీయ జెఎసి నేత కోదండరామ్ విమర్సించారు. ఎపిపిఎస్సీలో తమ ప్రాంత అభ్యర్థులకు అన్యాయం జరుగుతోందని ఆయన అన్నారు. అన్యాయాన్ని సరిదిద్దాలని మాత్రమే తాము కోరుతున్నామని ఆయన ఆదివారం ఉదయం మీడియా ప్రతినిధులతో అన్నారు. తమ ప్రాంతానికి చెందిన మంత్రులు, శాసనసభ్యులు, పార్లమెంటు సభ్యులు కోరుతున్నా ప్రభుత్వం ఎపిపిఎస్సీ గ్రూప్ వన్ పరీక్షను వాయిదా వేయడం లేదని, ఇది ప్రభుత్వ నిరంకశుత్వానికి నిదర్శనమని ఆయన విమర్శించారు. తెలంగాణ అంతటా పోలీసులు జెఎసి నాయకులను అరెస్టు చేస్తున్నారని ఆయన అన్నారు.

తమ ప్రాంత విద్యార్థుల డిమాండ్లపై చర్చించేందుకు కూడా ప్రభుత్వం సిద్దంగా లేదని, ఇది ప్రజాస్వామిక పద్దతి కాదని ఆయన అన్నారు. అది ప్రజాస్వామిక ప్రభుత్వం చేయాల్సిన పని కాదని ఆయన అన్నారు. తమ ప్రాంత ప్రజాప్రతినిధులకు, మంత్రులకు ముఖ్యమంత్రి ప్రాధాన్యం ఇవ్వడం లేదని, సీమాంధ్ర మంత్రులు, ప్రజాప్రతినిధులు అడిగితే ఇలా వ్యవహరించి ఉండేవారు కారని ఆయన అన్నారు. వివక్షాపూరితమైన పద్ధతి కొనసాగుతోందని ఆయన అన్నారు. తెలంగాణ విద్యార్థులు తమ న్యాయమైన డిమాండ్ ను పరిష్కరించాలని కోరుతున్నారని, దానిపై కనీసం చర్చించేందుకు కూడా ప్రభుత్వం సిద్ధంగా లేదని ఆయన అన్నారు.