ఎమ్మార్ ప్రాపర్టీస్ స్కామ్ మీద ప్రభుత్వంపై దండెత్తిన చంద్రబాబు

రాజమండ్రి: ఎమ్మార్ ప్రాపర్టీస్ కుంభకోణంపై ప్రభుత్వ స్పందనపై తెలుగుదేశం పార్టీ అధ్యక్షుడు నారా చంద్రబాబు నాయుడు దండెత్తారు. ఎమ్మార్‌ ప్రాపర్టీస్‌పై ప్రభుత్వం చర్యలు తీసుకోలేకపోతోందని ఆయన ఆరోపించారు. మూడురోజుల తూర్పుగోదావరి జిల్లా పర్యటనకు వచ్చిన ఆయన గురువారం రాజమండ్రిలో మీడియాతో మాట్లాడారు. రాష్ట్రంలో ప్రభుత్వపాలన లేదని ప్రజాసమస్యలను గాలికి వదిలేశారని అన్నారు. ఎన్నికల నిర్వహణకు ధైర్యం లేకే మున్సిపల్‌ ఎన్నికలను వాయిదావేశారన్నారు.

రాష్ట్రంలో ప్రభుత్వం నడవడం లేదని, ప్రభుత్వం ఉందా అనే అనుమానాలు కలుగుతున్నాయని ఆయన అన్నారు. పోలవరం, ప్రాణహిత ప్రాజెక్టులకు జాతీయ హోదాను సాధించడంలో రాష్ట్ర ప్రభుత్వం విఫలమైందని ఆయన అన్నారు. రాష్ట్రంలో అవినీతి పెచ్చరిల్లిందని, మంత్రులు అవినీతికి పాల్పడుతూ ప్రజా సమస్యలను పట్టించుకోవడం లేదని ఆయన అన్నారు.