తల్లికి హెచ్ఐవి రక్తం ఎక్కించిన ఇద్దరు కూతుళ్లు, అల్లుడు అరెస్టు

గుంటూరు: తల్లికి హెచ్ఐవి పాజిటివ్ రక్తం ఎక్కించి ఆస్తిని కాజేయాలని చూసిన కూతుళ్లను, అల్లుడిని పోలీసులు అరెస్టు చేశారు. ఆస్తిని కాజేయాలని తనకు హెచ్ఐవి రక్తం ఎక్కించారని ఓ తల్లి తన కూతుళ్లపై పోలీసులకు ఫిర్యాదు చేసిన విషయం తెలిసిందే. ఈ కేసులో కూతుళ్లు కామేశ్వరి, దుర్గాదేవిలను, అల్లుడు సాంబశివుడిని పోలీసులు అరెస్టు చేశారు. వారు నేరం చేశారని నిరూపించడానికి తమ వద్ద ఆధారాలున్నాయని పోలీసులు అంటున్నారు. సరైన ఆధారాలు సేకరించిన తర్వాతనే వారిని అరెస్టు చేసినట్లు సమాచారం.

తమ కుట్ర జరిగిందని కూతుళ్లు, అల్లుడు అంటున్నారు. ఆస్తి గొడవలున్న మాట వాస్తవమేనని, అయితే తాము తల్లికి హెచ్ఐవి పాజిటివ్ రక్తం ఎక్కించారని ఆరోపిస్తూ కుట్ర చేస్తున్నారని వారు చెబుతున్నారు. ఆమెకు హెచ్ఐవి రక్తం ఎక్కించిన సంఘటనతో తమకు సంబంధం లేదని వారంటున్నారు. భారతి మాత్రం తనపై కూతుళ్లే కుట్ర చేశారని అంటోంది.