సోంపేట మళ్లీ ఉద్రిక్తం: ధర్మానను అడ్డుకుంటామన్న స్థానికులు

శ్రీకాకుళం: శ్రీకాకుళం జిల్లాలోని సోంపేటలో మరోసారి ఉద్రిక్త వాతావరణం నెలకొంది. సోంపేటలో నిర్మించ తలపెట్టిన థర్మల్ ప్లాంట్, అణు విద్యుత్ నిర్మాణాలకు అనుకూలంగా ఉన్న రెవిన్యూ శాఖ మంత్రి ధర్మాన ప్రసాదరావు, మరో మంత్రి గల్లా అరుణాకుమారిల సోమవారం పర్యటనను ఇక్కడ అడ్డుకుంటామని స్థానికులు హెచ్చరిస్తున్నారు. స్థానికులకు పౌర హక్కుల సంఘం వారు కూడా అండగా ఉన్నారు. వారు కూడా వారిని అడ్డుకోవడానికి సిద్ధమయ్యారు. దీంతో ఆ ప్రాంతంలో పోలీసులు 144వ సెక్షన్ విధించారు. ఈ కారణంగా సోంపేటలో బంద్ వాతావరణం నెలకొంది. 3000 మంది పోలీసులు పహారా కాస్తున్నారు.

గతంలోనూ సైతం ధర్మాన ప్రసాదరావు, ఎంపీ కిల్లి కృపారాణిని స్థానికులు అడ్డుకున్నారు. అయితే జూలై 14న కాల్పులు జరిగిన అనంతం ఈ పరిస్థితి పూర్తిగా మారిపోయింది. ప్రతిపక్ష పార్టీలు, మానవ హక్కుల వాళ్లు వారికి తోడయ్యారు. పర్యావరణానికి కీడుగా పరిమణించే పవర్ ప్లాంట్ ను ఎట్టి సందర్భాలలోనూ నెలకొల్పనిచ్చేది లేదని పౌరహక్కుల వారు, పర్యావరణ పరిరక్షకులు అంటున్నారు.

ఇందులో భాగంగా స్థానికులకు ప్లాంట్లకు వ్యతిరేకంగా చెప్పడానికి వెళ్లిన పౌరహక్కుల నేతలను 20 మందిని సంతబొమ్మాళీ పోలీసులు అరెస్టు చేశారు. సోమవారం మంత్రుల పర్యటన సందర్భంగా వారిని పోలీసు స్టే,షన్లోనే ఉంచే పరిస్థితులు ఉన్నాయి.