గద్దర్ పై నిప్పులు చెరిగిన కాంగ్రెసు ఎంపి మందా జగన్నాథం

హైదరాబాద్: తెలంగాణపై తమ మీద విమర్శలు చేసిన తెలంగాణ ప్రజా ఫ్రంట్ అధ్యక్షుడు గద్దర్ పై కాంగ్రెసు పార్లమెంటు సభ్యుడు మందా జగన్నాథం తీవ్రంగా మండిపడ్డారు. తెలంగాణ కోసం కాంగ్రెసు పార్లమెంటు సభ్యులు చేసిందేమీ లేదని గద్దర్ చేసిన వ్యాఖ్యలను ఆయన ఖండించారు. కాంగ్రెసు తెలంగాణ ప్రాంత నాయకులు సోమవారం పార్లమెంటు సభ్యుడు జి. వివేక్ నివాసంలో సమావేశమయ్యారు. ఈ సమావేశానంతరం మందా జగన్నాథం మీడియాతో మాట్లాడారు. గద్దర్ తన పనేదో తాను చూసుకోవాలని ఆయన సలహా ఇచ్చారు. తెలంగాణపై పార్లమెంటులో ఎవరూ మాట్లాడలేదని గద్దర్ అనడం సరి కాదని ఆయన అన్నారు.

కళ్లుండీ గద్దర్ తాము తెలంగాణ కోసం ఏం చేశామో చూడలేకపోతున్నారని ఆయన వ్యాఖ్యానించారు. తెలంగాణపై గద్దర్ చిత్తశుద్ధి మీద తమకు సందేహాలు లేవని, అయితే తెలంగాణ కోసం కాంగ్రెసు పార్లమెంటు సభ్యులు ఏమీ చేయలేదని గద్దర్ అనడం తప్పు అని ఆయన అన్నారు. ఈ నెల 23వ తేదీన తెలంగాణ త్యాగధనుల సంస్మరణ సభను మహబూబ్ నగర్ లో నిర్వహించాలని కాంగ్రెసు నాయకులు నిర్ణయించుకున్నారు. ఇంతకు ముందు కరీంనగర్ లోనూ ఆదిలాబాద్ జిల్లా మంచిర్యాలలోనూ కాంగ్రెసు తెలంగాణ ప్రాంత నాయకులు తెలంగాణ త్యాగధనుల సంస్మరణ సభలను నిర్వహించారు.