జగన్ వర్గీయుడు మేకపాటిపై నారా లోకేష్ టీవీ చానెల్ ఆరోపణలు

నెల్లూరు‌: కడప పార్లమెంటు సభ్యుడు వైయస్ జగన్ వర్గానికి చెందిన కాంగ్రెసు పార్లమెంటు సభ్యుడు మేకపాటి రాజమోహన్ రెడ్డిపై తెలుగుదేశం పార్టీ తనయుడు లోకేష్ కు చెందిన స్టూడియోఎన్ తీవ్ర ఆరోపణలు చేస్తూ ఓ వార్తాకథనాన్ని ప్రసారం చేసింది. మేకపాటి రాజమోహన్ రెడ్డికి చెందిన మెరిట్ ఇంజనీరింగ్ కళాశాల యాజమాన్యం విద్యార్థులను వేధిస్తోందని ఆరోపించింది. ప్రత్యేకంగా జగన్ వర్గానికి చెందిన మేకపాటి రాజమోహన్ రెడ్డి అని చెబుతూ కళాశాల యాజమాన్యంపై ఆరోపణలు చేసింది.

ఫీజులు కట్టే వరకు హాల్ టికెట్లు ఇవ్వబోమని కళాశాల యాజమాన్యం విద్యార్థులను వేధిస్తోందని, గత రెండు రోజులుగా 150 మంది విద్యార్థులు ఆందోళనకు దిగారని చెప్పింది. విద్యార్థులనే కాకుండా మీడియాను కూడా కళాశాల యాజమాన్యం బ్లాక్ మెయిల్ చేస్తోందని ఆరోపించింది. ఓ విద్యార్థి చేత మాట్లాడించింది కూడా. అయితే, ఆ విద్యార్థి తన పేరు చెప్పడానికి గానీ తాను టీవీలో కనిపించడానికి గానీ ఇష్టపడలేదు. యాజమాన్యం వేధిస్తున్న విషయాన్ని మాత్రం ధ్రువీకరించాడు.