వైయస్ జగన్ క్యాంప్ మంత్రులు ఔట్: చిరంజీవితో కుదిరిన డీల్

న్యూఢిల్లీ: కడప పార్లమెంటు సభ్యుడు వైయస్ జగన్ ఆపరేషన్ ప్రారంభమైనట్లే ఉంది. ముఖ్యమంత్రి కె. రోశయ్య మంత్రి వర్గ పునర్వ్యస్థీకరణకు కాంగ్రెసు అధ్యక్షురాలు సోనియా గాంధీ గ్రీన్ సిగ్నల్ ఇచ్చినట్లు చెబుతున్నారు. అందుకే రోశయ్య మంగళవారం సాయంత్రం హుటాహుటిన హైదరాబాదుకు తిరుగు ప్రయాణమైనట్లు తెలుస్తోంది. వైయస్ జగన్ వర్గానికి చెందిన నలుగురు మంత్రులకు ఉద్వాసన వలికే అవకాశం ఉన్నట్లు ప్రచారం జురుగుతోంది. పిల్లి సుభాష్ చంద్రబోస్, కోమటిరెడ్డి వెంకటరెడ్డి, వట్టి వసంతకుమార్, బాలినేని శ్రీనివాస రెడ్డికి మంత్రివర్గం నుంచి తప్పిస్తారని అంటున్నారు. కొత్తగా రోశయ్య తన మంత్రివర్గంలోకి ఎనిమిది జిల్లాల నుంచి ఎనిమిది మందిని తీసుకుంటారని అంటున్నారు.

జానారెడ్డి, బసవరాజు సారయ్య, రాంభూపాల్ రెడ్డి, డిఎల్ రవీంద్రా రెడ్డి, జెసి దివాకర్ రెడ్డి, గొట్టిపాటి రవికుమార్, నరసింహం, టి బాలరాజులకు మంత్రివర్గంలోకి రావచ్చునని అంటున్నారు. మంత్రివర్గాన్ని రోశయ్య పూర్తి స్థాయిలో విస్తరించే అవకాశం ఉంది. ప్రజారాజ్యం పార్టీ నుంచి చిరంజీవికి డిప్యూటీ ముఖ్యమంత్రిగా ఇచ్చి, మరికొంత మందికి మంత్రి పదవులు ఇచ్చే అవకాశం ఉన్నట్లు చెబుతున్నారు. చిరంజీవి సోనియా గాంధీ రాజకీయ సలహాదారు అహ్మద్ పటేల్ తో రహస్యగా సమావేశమైనట్లు వార్తలు వస్తున్నాయి. ఈ రహస్య సమావేశంలో డీల్ కుదిరినట్లు సమాచారం.