మందకృష్ణ మాదిగపై మాల కాంగ్రెసు నేతల మండిపాటు

న్యూఢిల్లీ/హైదరాబాద్: ఎస్సీ రిజర్వేషన్ల వర్గీకరణ విషయంపై మాదిగ రిజర్వేషన్ పోరాట సమితి (ఎమ్మార్పీయస్) నేత మందకృష్ణ మాదిగపై కాంగ్రెసు మాల నాయకులు తీవ్రంగా మండిపడుతున్నారు. తనపై మందకృష్ణ మాదిగ చేసిన వ్యాఖ్యలపై మంత్రి పి. శంకర్ రావు తీవ్రమైన వ్యాఖ్య చేశారు. మందకృష్ణ మాదిగ చాలా చిన్నవాడని ఆయన వ్యాఖ్యానించార. మందకృష్ణ మాదిగకు ఏపాటి బలముందో మథిర శానససభా నియోజకర్గంలో పోటీ చేసినప్పుడే తేలిపోయిందని ఆయన సోమవారం మీడియా ప్రతినిధులతో అన్నారు. తాను ఏడు సార్లు పోటీ చేస్తే ఒక్కసారి మాత్రమే ఓడిపోయానని, ప్రజల మద్దతు ఎవరికి ఏపాటిదో తెలుసునని ఆయన అన్నారు.

వర్గీకరణకు పట్టుబడుతూ మందకృష్ణ మాదిగ చేస్తున్న ఆమరణ నిరాహార దీక్షను కాంగ్రెసు పార్లమెంటు సభ్యుడు హర్షకుమార్ తప్పు పట్టారు. ఎస్సీ రిజర్వేషన్ల వర్గీకరణ జరగదనే విషయం మందకృష్ణకు తెలిసినా ఆందోళనలు చేస్తున్నారని ఆయన విడిగా మీడియా ప్రతినిధులతో అన్నారు. ప్రభుత్వాలను బ్లాక్ మెయిల్ చేయడమే మందకృష్ణ మాదిగ పనిగా పెట్టుకున్నారని ఆయన అన్నారు. ఉనికిని కాపాడుకోవడానికే మందకృష్ణ ఈ విధమైన చర్యలకు పూనుకుంటున్నారని ఆయన విమర్శించారున.