వారణాసి బాంబు పేలుడు: ముంబై నుంచి టెర్రర్ ఇ మెయిల్

వారణాసి: వారణాసి బాంబు పేలుడుకు తామే కారణమని చెప్పుకుంటూ ముంబై నుంచి ఇ - మెయిల్ వచ్చినట్లు తెలుస్తోంది. ముంబై శివారులోని మలాద్ లోని ఓ కాల్ సెంటర్ నుంచి ఈ మెయిల్ పంపినట్లు పోలీసులు కనుక్కున్నారు. ఆల్ - ఫతే అనే గ్రూపు ఐడి నుంచి ఈ మెయిల్ వెళ్లింది. ఇండియన్ ముజాహిదీన్ కు ఇది అనుబంధ సంస్థ కావచ్చునని భావిస్తున్నారు. వారణాసి బాంబు పేలుడుకు తామే కారణమని ఇండియన్ ముజాహిదీన్ ప్రకటించింది. పవిత్ర పుణ్యక్షేత్రమైన కాశీ (వారణాసి)లోని గంగానది స్నానాల ఘాట్‌ వద్ద మంగళవారం సాయంత్రం తీవ్రవాదులు బాంబు పేల్చడంతో రెండేళ్ల పాప చనిపోగా 25 మంది గాయపడ్డారు. గాయపడిన వారిలో ఇద్దరు విదేశీయులు కూడా ఉన్నారు.

దుర్ఘటన జరిగిన సమయంలో అశ్వమేథ్‌ ఘాట్‌ వద్ద రద్దీ ఎక్కువగా ఉన్నా తీవ్రవాదులు తీవ్రత తక్కువ ఉన్న బాంబును ఉపయోగించడం వల్ల ఎక్కువ మందికి ప్రాణాపాయం సంభవించలేదు. రద్దీగా ఉన్న ప్రాంతంలో బాంబు పేలడంతో ఒక్కసారిగా తొక్కిసలాట జరిగింది. దీంతో చాలా మంది స్వల్పంగానైనా గాయపడ్డారు. కాశీ ఘటనతో దేశం ఒక్కసారిగా ఉలిక్కిపడింది. దేశ రాజధానితో సహా ముఖ్య నగరాలన్నింటినీ భద్రతాధికారులు అప్రమత్తం చేశారు. పేలుడు ప్రాంతానికి సమీపంలోని చెత్తబుట్ట నుంచి ఇంప్రొవైస్‌డ్‌ ఎక్స్‌ప్లోజివ్‌ డివైజ్‌ (ఐఈడీ)ని పోలీసులు స్వాధీనం చేసుకున్నారు. 1992లో జరిగిన బాబ్రీ కూల్చివేతకు నిరసనగా ఈ దుశ్చర్యకు పాల్పడినట్లు ఇండియన్‌ ముజాహిదీన్‌ ప్రకటించుకుంది. ఈ మేరకు పత్రికలకు ఈమెయిల్స్‌ పంపింది.