తెలంగాణపై శ్రీకృష్ణ కమిటీకి కట్టుబడి ఉంటాం: పుష్కరాలలో చిరంజీవి

అదిలాబాద్: ప్రత్యేక తెలంగాణ రాష్ట్రంపై కేంద్ర ప్రభుత్వం నియమించిన శ్రీకృష్ణ కమిటీ నివేదికకు ప్రజారాజ్యం కట్టుబడి ఉంటుందని ఆ పార్టీ వ్యవస్థాపక అధ్యక్షుడు చిరంజీవి ఆదివారం అదిలాబాద్ లో అన్నారు. ఆయన ప్రాణహిత పుష్కరాలలో పాల్గొనడానికి ఆదివారం ప్రత్యేక హెలికాప్టరులో అదిలాబాద్ లోని అర్జులగుట్టకు చేరుకున్నారు. ఆక్కడ ప్రాణహిత నదిలో పుష్కర స్నానమాచరించారు. ఈ సందర్భంగా పలువురు తెలంగాణవాదులు చిరంజీవికి వ్యతిరేకంగా నినాదాలు చేశారు. తెలంగాణకు అనుకూలంగా నిర్ణయం తీసుకోవాలని కోరారు. జై తెలంగాణ అనాలన్నారు.

అందుకు స్పందించిన చిరంజీవి ప్రజారాజ్యం పార్టీ శ్రీకృష్ణ కమిటీ ఇచ్చే నివేదికకు కట్టుబడి ఉంటుందన్నారు. తెలంగాణలో ప్రజారాజ్యం కార్యకర్తలు నా వెంటే ఉన్నారని ప్రకటించారు. తెలంగాణలో ప్రజారాజ్యానికి ఎలాంటి ఢోకా లేదని చెప్పారు. మంత్రివర్గంలో ప్రజారాజ్యం చేరుతుందని వస్తున్న వార్తలలో వాస్తవం లేదన్నారు. అదంతా అభూతకల్పనగా కొట్టిపారేశారు. కొందరు కావాలనే ఇలాంటి ఆరోపణలు చేస్తున్నారన్నారు.