కూచిపూడిపై సిలికానాంధ్ర కృషిపై కిరణ్ కుమార్ రెడ్డి ప్రశంసలు

హైదరాబాద్: తెలుగుదనానికి ప్రతిరూపమైన కూచిపూడి నృత్యాన్ని ముందు తరాలకు అందించాలని ముఖ్యమంత్రి కిరణ్ కుమార్ రెడ్డి శుక్రవారం సిలికానాంధ్ర మాదాపూర్ హెచ్ఐసిసిలో ఏర్పాటు చేసిన రెండో అంతర్జాతీయ కూచిపూడి కన్వెన్షన్ కార్యక్రంలో చెప్పారు. కార్యక్రమానికి అందరూ తెలుగుదనం ఉట్టిపడేలా రావటం పట్ల ఆయన సంతోషం వ్యక్తం చేశారు. విదేశాల్లో ఉండేవారు ఏర్పాటు చేసిన కార్యక్రమం కాబట్టి కార్యాలయ అధికారులు ఆంగ్లంలో స్పీచ్ ను తయారు చేసినప్పటికీ కార్యక్రమంలో అంతా తెలుగుదనం ఉట్టిపడుతున్నందున తెలుగులోనే మాట్లాడుతానని చెప్పారు. ప్రతి ఒక్కరూ సాంప్రదాయ దుస్తుల్లో వచ్చారని అభినందించారు.

కూచిపూడి నృత్యాన్ని నేర్చుకోవడానికి వేలమంది ఆసక్తి కనబరుస్తున్నారని, ఆ నాట్యం యొక్క గొప్పతనం ముందు తరాలకు అందించవలసి అవసరం మనపైన ఉందన్నారు. రెండేళ్ల క్రితం అన్నమయ్య గేయాన్ని లక్షా అరవై వేల మంది లక్ష గళార్చన చేసి గిన్నిస్ రికార్డు నెలకొల్పారని గుర్తు చేశారు. సిలికానాంధ్ర చేస్తున్న కృషిని ప్రభుత్వం సహకారం అందిస్తుందన్నారు. ప్రభుత్వం నుండి 25 లక్షల రూపాయలను ఇస్తున్నట్టు చెప్పారు. అమెరికాలో ఉంటూ అన్నమాచార్య కీర్తనలు పెట్టించటం, కూచిపూడి నృత్యాలు ఏర్పాటు చేయడం చాలా మంచి పని అన్నారు.

ఆంధ్ర కళాసంపదను రక్షించుకోవాల్సిన బాధ్యత మనపైన ఉన్నదని అంతకుముందు కేంద్రమంత్రి పురంధేశ్వరి మాట్లాడుతూ చెప్పారు. మన నృత్యశైలిలోని రూపాలు ఇతిహాసాలు, పురాణాలలో ఉన్నాయన్నారు. భంగిమ, ముఖ కవళికలు, ముద్ర తదితరాలు కూచిపూడిలో ఉంటాయని చెప్పారు. నాట్యశాస్త్రం, గాథసప్తశతి పుస్తకాలు మన నాట్యం గురించి వివరించాయని చెప్పారు.