వైయస్ జగన్ క్యాంపు ఎమ్మెల్యేపై మంత్రి పళ్లంరాజు సెటైర్

రాజమండ్రి: మాజీ పార్లమెంటు సభ్యుడు వైయస్ జగన్మోహన్ రెడ్డి క్యాంపు శాసనసభ్యుడిపై మంత్రి పళ్లం రాజు సెటైర్లు వేశారు. సదరు శాసనసభ్యుడి ముందే ఈ సెటైర్లు వేయడం విశేషం. కాకినాడలో మంత్రి పళ్లం రాజు విలేకరుల సమావేశం ఏర్పాటు చేశారు. ఆ సమావేశంలో కాకినాడ శాసనసభ్యుడు ద్వారంపూడి చంద్రశేఖరరెడ్డి కూడా పాల్గొన్నారు. ఆ సమయంలో మంత్రి ద్వారంపూడిపై సెటైర్లు వేశారు. ద్వారంపూడి తన మనసుకు మేకప్ చేసుకుంటున్నారన్నారు.

కాంగ్రెస్ పార్టీ క్యాడర్ ద్వారా దివంగత ముఖ్యమంత్రి వైయస్ రాజశేఖరరెడ్డి ఆశీస్సులతో గెలిచిన తాను కాంగ్రెస్ వైపు ఉండాలా, వైయస్ జగన్ వైపు ఉండాలా అని నిర్ణయించుకోలేక పోతున్నారన్నారు. ప్రభుత్వం విద్యార్థులపై పెట్టిన కేసులను ఎత్తివేయడం దురదృష్టకరమని పళ్లం రాజు అన్నారు. పరిస్థితిని బట్టి ప్రభుత్వం నిర్ణయం తీసుకోవాల్సి ఉంటుందన్నారు. అయితే ఇలాంటి సంఘటనలు భవిష్యత్తులో జరగవన్నారు. ప్రభుత్వం కూడా ఇలాంటి సంఘటనలు జరగకుండా చూస్తుందన్నారు.