శ్రీకృష్ణ కమిటీ వృథా కమిటీ, అఖిలపక్షం అనవసరం: తెలంగాణ కాంగ్రెస్

హైదరాబాద్: తెలంగాణ అంశంపై కేంద్ర కమిటీ వేసిన శ్రీకృష్ణ కమిటీ ఓ వృథా కమిటీ అని కాంగ్రెస్ పార్టీ సీనియర్ నాయకుడు, శాసనసభ్యుడు దామోదరరెడ్డి ఆదివారం అన్నారు. అఖిలపక్షం వేయడం కూడా వృథాయే అని అన్నారు. చిదంబరం 6వ తేదిన అఖిలపక్షానికి తాము కూడా వెళ్లొద్దని అనుకుంటున్నామని చెప్పారు. శ్రీకృష్ణ కమిటీ సభ్యులు మీడియాకు బహుమానాలు ఇవ్వడం ఏమిటని ఆయన ప్రశ్నించారు. కమిటీ నివేదికతో మాకు సంబంధం లేదన్నారు. మాకు కావాల్సింది తెలంగాణ అని చెప్పారు.

అఖిలపక్ష సమావేశానికి తెలంగాణ రాష్ట్ర సమితి వెళ్లనని ప్రకటించడాన్ని కాంగ్రెస్ పార్టీ సీనియర్ నాయకుడు ఆమోస్ స్వాగతిస్తున్నట్టు చెప్పారు. కమిటీ తన నివేదిక ఇచ్చాక అఖిలపక్షం ఎందుకు అని ఆయన ప్రశ్నించారు. గత సంవత్సరం కూడా అఖిలపక్షంతో తాత్సారం చేశారన్నారు. మేం కూడా అఖిలపక్షానికి గైర్హాజరీ విషయంలో పార్టీలో చర్చిస్తామని చెప్పారు.