అలుగుట ఎరుగని జగన్ అలిగాడు, ప్రళయం వస్తుంది: రోజా

న్యుఢిల్లీ: మాజీ పార్లమెంటు సభ్యుడు వైయస్ జగన్మోహన్‌రెడ్డి వెనుక లక్షలమంది ప్రజలు ఉన్నారని సినీ హీరోయిన్, రాజకీయ నాయకురాలు రోజా మంగళవారం జగన్ ఢిల్లీలో చేపట్టిన జల దీక్షలో అన్నారు. అలుగుటయే ఎరుగని జగన్ అలిగాడని ప్రళయం వస్తుందన్నారు. కృష్ణా ట్రిబ్యునల్ తీర్పుపై ఆమె ధ్వజమెత్తారు. కష్టాల్లో ఉన్న రైతులకు బ్రజేష్ కుమార్ తీర్పు మరింత నిరాశకు గురి చేసిందన్నారు. బచావత్ ట్రిబ్యునల్ నికర జలాలను 75 శాతం తీసుకుంటే బ్రజేష్ కమిటీ 65కు మాత్రమే తీసుకోవడం దారుణమన్నారు. ఈ తీర్పు వల్ల మహారాష్ట్ర, కర్ణాటకకు ఎక్కువ నీరు వెళ్లగా రాష్ట్రానికి తీవ్రంగా నష్టం జరుగుతుందన్నారు. నికర జలాలు తగ్గడం వల్ల రాష్ట్రంలోని పంటలకు తీవ్ర నష్టమన్నారు.

పలు ప్రాజెక్టులకు నీరు అందక పోయే పరిస్థితి ఏర్పడుతుందన్నారు. మన లాయర్లు వాదనలు, మన అధికార్ల వినతులను బ్రజేష్ కమిటీ తోసి పుచ్చిందన్నారు. రాష్ట్ర, కేంద్ర ప్రభుత్వాల అలసత్వం కారణంగానే రాష్ట్రానికి అన్యాయం జరిగిందన్నారు. తెలుగుదేశం, భారతీయ జనతా పార్టీ వ్యవసాయం కోసం ఎలాంటి ప్రాజెక్టులు కట్టక పోవటం శోచనీయమన్నారు. ప్రాజెక్టుల వల్ల ఉపయోగాలు తెలుసుకున్న వైయస్ ప్రాజెక్టులకు శంకుస్థాపన చేశారు. అయితే ఆయన మరణం తర్వాత ప్రాజెక్టులు మూలన పడ్డాయన్నారు. వైయస్ ఆశయాలు ముందుకు తీసుకెళతామన్న రాష్ట్ర ప్రభుత్వం ఆయన ఆశయాల పట్ల నిమ్మకు నీరెత్తినట్లు ఉందన్నారు. పోలవరానికి, ప్రాణహిత - చేవెళ్ల జాతీయ హోదాకు వైయస్ అప్పుడు కోరినప్పటికి కేంద్ర ప్రభుత్వం స్పందించలేదన్నారు.

ఎక్కువ ఎంపీలను అందించి సహాయం చేసిన రాష్ట్రానికి సహాయ మంత్రులు, వేరే రాష్ట్రాల ఎంపీలకు మంత్రి పదవులా అని ప్రశ్నించారు. ఆంధ్రా ప్రజల నోట్లో మట్టి కొట్టడానికే కర్ణాటక ఆలమట్టి డ్యాం ఎత్తు పెంచిందన్నారు. నాడు దేవేగౌడ చేపట్టిన ఆలమట్టి డ్యాం వల్ల మనం ఇప్పుడు కష్టాలు ఎదుర్కొనవలసి వస్తుందన్నారు. తీర్పు వల్ల అన్నపూర్ణగా ఉండాల్సిన రాష్ట్రం అన్నమో రామచంద్రా అనే పరిస్థితి ఏర్పడిందన్నారు. అందరూ జగన్ ‌కు మద్దతుగా ఉంటే మన సమస్యలు తీర్చుకోవచ్చన్నారు. ఆంధ్ర రాష్ట్ర ప్రజలు కన్నెర్ర చేస్తే రాష్ట్ర, కేంద్ర ప్రభుత్వాలు మట్టి కరుస్తాయన్నారు.