అనుకున్నది నెరవేరిందంటూ రాత్రి అరెస్టయిన వైయస్ జగన్

న్యూఢిల్లీ: కృష్ణానది జలాల పంపకంలో ఆంధ్రప్రదేశ్ రాష్ట్రానికి జరుగుతున్న అన్యాయాన్ని దేశంలోని ప్రతి ఒక్కరికి చేరవేయడంలో మనమంతా సఫలీకృతమయ్యామని వైయస్ జగన్ తన మద్దతుదారులను ఉద్దేశించి అన్నారు. జంతర్ మంతర్ వద్ద సాయంత్రం 5 గంటల అనంతరం ఎటువంటి దీక్షలు చేపట్టరాదన్న ఆంక్షలున్నాయని ఇక్కడి పోలీసులు చెపుతున్నారనీ, అయినప్పటికీ తనకు మరో నాలుగ్గంటలపాటు దీక్ష చేసేందుకు అవకాశం ఇచ్చామని పోలీసులు గొప్పలు చెపుతున్నా వారి మాటతో తాను సంతృప్తి చెందడం లేదని ఆయన అన్నారు.

కాదు కూడదని దీక్ష కొనసాగిస్తే తనను పోలీసులు అరెస్టు చేస్తారనీ, ప్రతిఘటిస్తే తన వెంట వచ్చినవారికి గాయాలు అవుతాయన్నారు. అది తనకు ఇష్టం లేదని, రాష్ట్రానికి జరుగుతున్న అన్యాయాన్ని దేశంలో ప్రతి ఒక్కరి దృష్టికి తెచ్చినట్లు భావిస్తున్నాననీ, తద్వారా జలదీక్ష సక్సెస్ అయిందని అనుకుంటున్నానని ఆయన అన్నారు. అనుకున్న పని నెరవేరింది కనుక అరెస్టయ్యేందుకు తను పోలీసులకు సహకరిస్తున్నట్లు జగన్ ప్రకటించారు. అయితే తనను అరెస్టు చేస్తున్నందుకు ఎవరూ ప్రతిఘటించవద్దని సూచించారు. ప్రధాని అపాయింట్‌మెంట్ కోరినా ఇవ్వలేదనీ, ఆ తప్పును కూడా ప్రముఖ జాతీయ ఛానళ్లు ఎత్తి చూపాయని చెప్పారు. జలదీక్షతో కేంద్రం చొరవ తీసుకుని కృష్ణా జలాల పంపిణీపై తగు నిర్ణయం తీసుకోకుంటే మళ్లీ ఆందోళన తప్పదని జగన్ హెచ్చరించారు.