సూరి హత్య కేసు, భాను కిరణ్ పేరు మీద ఒక్క ఆస్తి కూడా లేదా?

హైదరాబాద్: సూరి హత్య కేసులో నిందితుడు భాను కిరణ్ పేరు మీద ఒక్క ఆస్తి కూడా లేదని తెలుస్తోంది. అయితే భాను మాత్రం వివిధ రూపాల్లో కోట్లాది రూపాయలు కూడబెట్టినట్లు చెబుతున్నారు. వివిధ వ్యక్తుల పేర్ల మీద అతను తన ఆస్తులను పెట్టినట్లు తెలుస్తోంది. సూరి హత్య కేసులో నిందితులు సుబ్బయ్య, మన్మోహన్‌లను వారం రోజుల పాటు తమ కస్టడీకి అప్పగించాలని హైదరాబాదు నగర నేర పరిశోధక విభాగం (సిసిఎస్) పోలీసులు సోమవారం కోర్టును కోరుతూ ఓ పిటిషన్ దాఖలు చేశారు. ఈ పిటిషన్‌పై విచారణ మంగళవారానికి వాయిదా పడింది.

సూరి ఇంటి నుంచి పోలీసులు ల్యాప్ టాప్, సిడీలు, సెల్ ఫోన్లు స్వాధీనం చేసుకున్నట్లు తెలుస్తోంది. సూరి హత్య కేసులో నిందితుడు మన్మోహన్‌ను లింగపల్లి రైల్వే స్టేషన్‌లో, సుబ్బయ్య, వెంకటరమణ, హరిబాబులను నల్లగుల్ల గ్రామంలో పోలీసులు అరెస్టు చేశారు. సుబ్బయ్యను భాను వద్ద ఉండే కిరాయి హంతకుడిగా పోలీసులు అనుమానిస్తున్నారు. మన్మోహన్, సుబ్బయ్య, హరిబాబు, వెంకటరమణలు కిరాయి హంతకులని తెలుస్తోంది.