టిఆర్ఎస్ ఫండ్‌తో నిర్మించాలి: శాంతియాత్రలో మేధావుల డిమాండ్

By Srinivas

Published: Sunday, March 13, 2011, 12:32 [IST]

హైదరాబాద్: మిలియన్ మార్చ్ సందర్భంగా టాంక్‌బండ్ పైన ఉన్న మహనీయుల విగ్రహాలను ధ్వంసం చేయడాన్ని నిరసిస్తూ పలువురు మేధావులు ఆదివారం ఉదయం పదకొండు గంటల సమయంలో టాంక్‌బండ్‌పై జన చైతన్న వేదిక ఆధ్వర్యంలో శాంతి పాదయాత్ర చేశారు. కవులు, కళాకారులు శాంతియాత్ర నిర్వహించారు. ఈ సందర్భంగా వారు మాట్లాడారు. అన్నమయ్య, శ్రీకృష్ణ దేవరాయలు వంటి తదితరుల విగ్రహాలను ఆందోళనకారులు ధ్వంసం చేయడం విచారకరమన్నారు. విగ్రహాల ధ్వంసంపై క్షమాపణలు చెప్పటంతో సరిపుచ్చడం కాదన్నారు.

విగ్రహాలను పునర్నిర్మించడం ప్రభుత్వ ధనంతో కాకుండా టిఆర్ఎస్ ధనంతో నిర్మించాలన్నారు. విగ్రహాల కూల్చివేతపై వారు తీవ్ర నిరసన వ్యక్తం చేశారు. మహాకవుల విగ్రహాలను ధ్వంసం చేయడం ఎంత వరకు సమంజసం అన్నారు. ఇలాంటి సంఘటనలు పునరావృతం కాకుండా చూడాలని వారు ఈ సందర్భంగా విజ్ఞప్తి చేశారు. కాగా అంతకుముందు పోతన మాత్యుని విగ్రహం ఎదుట తెలుగు బాషా సంస్కృతి పరిరక్షణ సమితి ధర్నా నిర్వహించింది.

Published On March 13, 2011