మెరుగుపడిన సత్యసాయి ఆరోగ్యం: చికిత్సకు స్పందిస్తున్న బాబా

By Srinivas

Published: Friday, April 8, 2011, 9:22 [IST]

అనంతపురం: భగవాన్ శ్రీ సత్యసాయిబాబా ఆరోగ్యంపై తాజాగా వైద్య బృందం శుక్రవారం బులెటిన్ విడుదల చేసింది. బాబా ఆరోగ్యం పది రోజుల కంటే కుదుట పడిందని భక్తులు ఎలాంటి ఆందోళన చెందవద్దని వారు బులెటిన్‌లో పేర్కొన్నారు. బాబాకు డయాలసిస్ తగ్గించినట్లు డాక్టర్లు చెప్పారు. వైద్యులు చేస్తున్న చికిత్సకు బాబా సానుకూలంగా స్పందిస్తున్నారని చెప్పారు. బాబా కు రక్తపోటు(బిపి) సాధారణ స్థాయిలో ఉందని చెప్పారు.

బాబా కిడ్నీలు, కాలేయం, గుండెల పనితీరు బాగా మెరుగు పడిందని పేర్కొన్నారు. అయితే బాబాకు ఇంకా అవసరమైనందున వెంటిలేటర్ కొనసాగిస్తున్నట్లు చెప్పారు. బాబాకు ఆరోగ్యం కాస్త మెరుగు పడినందున ఈ రోజు నుండి డాక్టర్లు ద్రవాహారం ఇవ్వాలని నిర్ణయించుకున్నట్లుగా తెలుస్తోంది. కాగా బాబా ఆరోగ్యంపై ఉత్కంఠ తగ్గడంతో పుట్టపర్తిలో ఇప్పటి వరకు పెట్టిన కొన్ని ఆంక్షలను తొలగించారు. పోలీసులంతా అక్కడ ఉన్నప్పటికీ ఆంక్షలు మాత్రం కాస్త తగ్గించారు. కాగా ఇన్నాళ్లు మూసి వేసి ఉన్న దుకాణాలు ఈ రోజు కొన్ని తెరిచే అవకాశం ఉన్నట్టుగా తెలుస్తోంది.

Published On April 8, 2011