చంద్రబాబు మహానాడుకు తెలంగాణ సెగ, జై తెలంగాణ నినాదాలతో గొడవ

By Pratap

Published: Friday, May 27, 2011, 12:00 [IST]

హైదరాబాద్: హైదరాబాద్ సమీపంలోని గండిపేటలో శుక్రవారం ప్రారంభమైన తెలుగుదేశం పార్టీ మహానాడుకు తెలంగాణ సెగ తాకింది. తెలంగాణవాదులు జై తెలంగాణ నినాదాలతో మహానాడు ప్రాంగణానికి చేరుకున్నారు. పెద్ద యెత్తున తెలంగాణవాదులు అక్కడికి చేరుకున్నారు. తెలుగుదేశం పార్టీ కార్యకర్తలను వారిని అడ్డుకోవడానికి ప్రయత్నించారు. దీంతో ఘర్షణ వాతావరణం చోటు చేసుకుంది. కొందరు తెలంగాణ విద్యార్థులపై తెలుగుదేశం పార్టీ కార్యకర్తలు చేయి చేసుకున్నారు.

అప్రమత్తమైన పోలీసులు తెలంగాణవాదులను చెదరగొట్టారు. మహానాడుకు భారీ బందోబస్తు ఏర్పాటు చేశారు. అనుమానం ఉన్నవారిని గుర్తించి వెనక్కి పంపిస్తున్నారు. శుక్రవారం ఉదయం నుంచే తెలంగాణ విద్యార్థులు మహానాడు ప్రాంగణం వద్దకు చేరుకున్నారు. మహానాడును అడ్డుకుంటామని తెలంగాణ రాష్ట్ర సమితి (తెరాస) నాయకుడు చంద్రశేఖర్ గురువారం ప్రకటించారు. ఒయు జెఎసి కూడా మహానాడును అడ్డుకుంటామని చెప్పారు. మహానాడును అడ్డుకుని తీరుతామని ప్రకటించిన విద్యార్థులు మళ్లీ వచ్చే అవకాశాలున్నాయని చెబుతున్నారు.

Published On May 27, 2011