రాజీనామా చేస్తే అధిష్టానమే దిగి వస్తుంది: మాజీ మంత్రి జూపల్లి

By Srinivas

Published: Sunday, June 5, 2011, 15:51 [IST]

హైదరాబాద్: తెలంగాణ రాష్ట్రం రావాలంటే ఎవరూ ఢిల్లీ వెళ్లాల్సిన అవసరం లేదని మాజీ మంత్రి జూపల్లి కృష్ణారావు ఆదివారం టి-కాంగ్రెసు ప్రజాప్రతినిధులను ఉద్దేశించి అన్నారు. మంత్రులు అందరూ రాజీనామా చేస్తే అధిష్టానమే దిగి వస్తుందని సూచించారు. సీమాంధ్ర నేతలు కేవలం రెండు గంటలు హైదరాబాదులో ఉండి తెలంగాణను అడ్డుకున్నారని అలాంటప్పుడు తెలంగాణ ప్రజాప్రతినిధులు ఢిల్లీ వెళ్లవవలసిన అవసరం ఏమిటని ప్రశ్నించారు. నిజమైన తెలంగాణవాదులు పదవులు తీసుకోవద్దని చెప్పారు. పదవులు తీసుకుంటే తెలంగాణ ప్రజలను మోసం చేసినట్లే అని హెచ్చిరించారు.

కాగా సమైక్యవాదాన్ని వినిపిస్తున్న ముగ్గురికి ఏ పదవీ ఇవ్వవద్దని అధిష్టానానికి సూచించినట్లుగా నిజామాబాద్ పార్లమెంటు సభ్యుడు మధుయాష్కీ వేరుగా అన్నారు. సమైక్యవాది అయిన దామోదర రాజనరసింహకు ఉప ముఖ్యమంత్రి పదవి ఇస్తే సహించేది లేదన్నారు. పదవులు తీసుకోవడం తప్పు కాదని తెలంగాణకు పదవులకు సంబంధం లేదని మరో ఎంపీ సర్వే సత్యనారాయణ వేరుగా అన్నారు. తెలంగాణ, ఎస్సీ వర్గీకరణ వెంటనే చేయాలని ఆయన ప్రభుత్వాన్ని డిమాండ్ చేశారు. ఏఐసిసి అధ్యక్షురాలు సోనియాగాంధీపై ఇప్పటికీ తమకు గౌరవం ఉందన్నారు.

Published On June 5, 2011